use bhi meri mohabbat pe etibar nahin

use bhī merī mohabbat pe e'tibār nahīñ

ye soch soch ke dil ko mere qarār nahīñ

use bhī chhoḌ ke uḌ jā kahīñ tū ai bulbul

tire liye to ye gulshan bhī sāzgār nahīñ

lahū lahū hai jigar chaak chaak dil lekin

qabā-e-sabr-o-shakebā.ī tār-tār nahīñ

bahut dinoñ se tirī yaad bhī nahīñ aatī

bahut dinoñ se mujhe terā intizār nahīñ

uḌā na mere dil-e-nā-murād kī tū hañsī

mere nasīb meñ sar-mastī-e-bahār nahīñ

use bhulā.ūñ to kaise 'zafar' bhulā.ūñ maiñ

ki apne aap ye mujh ko aab iḳhtiyār nahīñ

use bhi meri mohabbat pe e'tibar nahin

ye soch soch ke dil ko mere qarar nahin

use bhi chhoD ke uD ja kahin tu ai bulbul

tere liye to ye gulshan bhi sazgar nahin

lahu lahu hai jigar chaak chaak dil lekin

qaba-e-sabr-o-shakebai tar-tar nahin

bahut dinon se teri yaad bhi nahin aati

bahut dinon se mujhe tera intizar nahin

uDa na mere dil-e-na-murad ki tu hansi

mere nasib mein sar-masti-e-bahaar nahin

use bhulaun to kaise 'zafar' bhulaun main

ki apne aap ye mujh ko aab iKHtiyar nahin