us se waqif hain sar-e-sahn-e-gulistan kitne

us se vāqif haiñ sar-e-sahn-e-gulistāñ kitne

ham kisī gul kī talab meñ haiñ pareshāñ kitne

maiñ ne ā.īna dikhāyā jo shah-e-daurāñ ko

mere is kār-e-junūñ par haiñ vo hairāñ kitne

maiñ ne samjhā thā jinheñ rāh-e-vafā meñ ābād

mere dil hī kī tarah vo bhī the vīrāñ kitne

un ke gesū jo pareshāñ haiñ hamāre ġham meñ

dosto un ke liye ham bhī haiñ be-jāñ kitne

maiñ usī but kī mohabbat meñ banā huuñ pāgal

toḌtā rahtā hai har din hī jo paimāñ kitne

kyā ġhazālān-e-mohabbat ko patā hai us kā

dushman-e-jāñ haiñ sar-e-dasht-o-bayābāñ kitne

ham to baḌhte hī rahe dasht-e-junūñ meñ aake

go ki paañv meñ chubhe ḳhār-e-muġhīlāñ kitne

sher ke fan meñ 'zafar' maiñ to nahīñ huuñ kāmil

faiz uThāte haiñ magar mujh se suḳhan-dāñ kitne

us se waqif hain sar-e-sahn-e-gulistan kitne

hum kisi gul ki talab mein hain pareshan kitne

main ne aaina dikhaya jo shah-e-dauran ko

mere is kar-e-junun par hain wo hairan kitne

main ne samjha tha jinhen rah-e-wafa mein aabaad

mere dil hi ki tarah wo bhi the viran kitne

un ke gesu jo pareshan hain hamare gham mein

dosto un ke liye hum bhi hain be-jaan kitne

main usi but ki mohabbat mein bana hun pagal

toDta rahta hai har din hi jo paiman kitne

kya ghazalan-e-mohabbat ko pata hai us ka

dushman-e-jaan hain sar-e-dasht-o-bayaban kitne

hum to baDhte hi rahe dasht-e-junun mein aake

go ki panw mein chubhe KHar-e-mughilan kitne

sher ke fan mein 'zafar' main to nahin hun kaamil

faiz uThate hain magar mujh se suKHan-dan kitne