اس سے واقف ہیں سر صحن گلستاں کتنے

اس سے واقف ہیں سر صحن گلستاں کتنے

ہم کسی گل کی طلب میں ہیں پریشاں کتنے

میں نے آئینہ دکھایا جو شہ دوراں کو

میرے اس کار جنوں پر ہیں وہ حیراں کتنے

میں نے سمجھا تھا جنہیں راہ وفا میں آباد

میرے دل ہی کی طرح وہ بھی تھے ویراں کتنے

ان کے گیسو جو پریشاں ہیں ہمارے غم میں

دوستو ان کے لئے ہم بھی ہیں بے جاں کتنے

میں اسی بت کی محبت میں بنا ہوں پاگل

توڑتا رہتا ہے ہر دن ہی جو پیماں کتنے

کیا غزالان محبت کو پتا ہے اس کا

دشمن جاں ہیں سر دشت و بیاباں کتنے

ہم تو بڑھتے ہی رہے دشت جنوں میں آکے

گو کہ پاؤں میں چبھے خار مغیلاں کتنے

شعر کے فن میں ظفرؔ میں تو نہیں ہوں کامل

فیض اٹھاتے ہیں مگر مجھ سے سخنداں کتنے