jo haq se dur hai wo haq samajh nahin sakta

jo haq se duur hai vo haq samajh nahīñ saktā

sivā.e zaq-zaq-o-baq-baq samajh nahīñ saktā

jo apnī hastī-e-mahdūd kā hai zindānī

vo rind hastī mutlaq samajh nahīñ saktā

varā-e-fahm bhī mafhūm kā taqayyud hai

ba-qaid-e-fahm jo mutlaq samajh nahīñ saktā

samajh sakā na jo haq kī khulī huī āyāt

hadīs-e-mubham-o-muġhlaq samajh nahīñ saktā

jamāl-e-haq ko ba-juz haq koī na dekhegā

kalām-e-haq ko ba-juz haq samajh nahīñ saktā

sifat kī zaat se nisbat jise nahīñ ma.alūm

vo rabt-e-dajla-o-zauraq samajh nahīñ saktā

zuhūr meñ nazar aayā na jis ko al-zāhir

vo farq-e-masdar-o-mushtaq samajh nahīñ saktā

'zahīn' fahm na ho fahm-e-haq meñ jab tak gum

haqīqat-e-haq-o-nāhaq samajh nahīñ saktā

jo haq se dur hai wo haq samajh nahin sakta

siwae zaq-zaq-o-baq-baq samajh nahin sakta

jo apni hasti-e-mahdud ka hai zindani

wo rind hasti mutlaq samajh nahin sakta

wara-e-fahm bhi mafhum ka taqayyud hai

ba-qaid-e-fahm jo mutlaq samajh nahin sakta

samajh saka na jo haq ki khuli hui aayat

hadis-e-mubham-o-mughlaq samajh nahin sakta

jamal-e-haq ko ba-juz haq koi na dekhega

kalam-e-haq ko ba-juz haq samajh nahin sakta

sifat ki zat se nisbat jise nahin malum

wo rabt-e-dajla-o-zauraq samajh nahin sakta

zuhur mein nazar aaya na jis ko al-zahir

wo farq-e-masdar-o-mushtaq samajh nahin sakta

'zahin' fahm na ho fahm-e-haq mein jab tak gum

haqiqat-e-haq-o-nahaq samajh nahin sakta