ye kaun barq-rawish tha jo muskura ke gaya

ye kaun barq-ravish thā jo muskurā ke gayā

ye kaun hausla-e-dil ko aazmā ke gayā

ye kis kī yaad kī letā huuñ chuTkiyāñ dil meñ

ye kaun jān-e-tamannā nazar laḌā ke gayā

ye kis ke jazba-e-ulfat meñ kho gayā huuñ maiñ

ye kaun be-kHud-e-hastī mujhe banā ke gayā

surūr-o-shauq jahāñ meñ hai kis kī sahbā kā

ye kaun bāda-e-mastī ke ḳhum luñDhā ke gayā

har ek be-piye mad.hosh aur be-ḳhud hai

ye kaun mahfil-e-rindāñ meñ mast aake gayā

hasīn ġhunchoñ se ye kaun ham-kalām huā

chaman-chaman ko masarrat-kada banā ke gayā

ye kis ke husn kī duniyā meñ jalva-bārī hai

ye kaun 'tāj' ke dil meñ jhalak dikhā ke gayā

ye kaun barq-rawish tha jo muskura ke gaya

ye kaun hausla-e-dil ko aazma ke gaya

ye kis ki yaad ki leta hun chuTkiyan dil mein

ye kaun jaan-e-tamanna nazar laDa ke gaya

ye kis ke jazba-e-ulfat mein kho gaya hun main

ye kaun be-kHud-e-hasti mujhe bana ke gaya

surur-o-shauq jahan mein hai kis ki sahba ka

ye kaun baada-e-masti ke KHum lunDha ke gaya

har ek be-piye madhosh aur be-KHud hai

ye kaun mahfil-e-rindan mein mast aake gaya

hasin ghunchon se ye kaun ham-kalam hua

chaman-chaman ko masarrat-kada bana ke gaya

ye kis ke husn ki duniya mein jalwa-bari hai

ye kaun 'taj' ke dil mein jhalak dikha ke gaya