آنسو جو امنڈ کر آہی گئے کچھ بات تھی دل میں رہ نہ سکے

آنسو جو امنڈ کر آہی گئے کچھ بات تھی دل میں رہ نہ سکے

جذباتِ محبت رک نہ سکے ہم حال زباں سے کہہ نہ سکے

نظریں جو ملائیں نظروں سے ہم ہوش و خرد کو بھول گئے

پہلے ہی نتیجہ ظاہر تھا پر دل کے تقاضے سہہ نہ سکے

یہ چشمِ تماشہ باز مگر باز آئی نہ لمحہ بھر کے لیے

وہ گرچہ توجہ فرما تھے ہم کچھ بھی تو دل کی کہہ نہ سکے

اے ضبطِ محبت تیری قسم جو ٹوٹ پڑے وہ اشک نہیں

آنسو تو فقط وہ موتی ہے پلکوں میں بندھے اور بہہ نہ سکے

تھے کتنے نکمے اور برے پر لاکھ سے بہتر ہو کے جیے

اے شانِ کرم صدقے میں ترے محروم کبھی ہم رہ نہ سکے

اے تاجؔ ہیں ہم راضی بہ رضا دنیا پہ ہے روشن اپنی وفا

ہے کون سا باقی کوہِ الم جو سر پہ پڑا اور سہہ نہ سکے