نقابِ رخ اٹھایا جا رہا ہے

نقابِ رخ اٹھایا جا رہا ہے

سکوں عالم پہ چھایا جا رہا ہے

بیادِ التفاتِ چشمِ جاناں

ہر اک ساغر اٹھایا جا رہا ہے

رخِ تاباں سے ہے روشن مرا دل

زمیں پر چاند چھایا جا رہا ہے

وہ بکھریں دیکھیے چہرہ پہ زلفیں

گہن میں چاند آیا جا رہا ہے

بشکلِ شمع دل کی حسرتوں کو

سرِ محفل جلایا جا رہا ہے

یہ بجلی بھی نہ آسودہ رہے گی

نشیمن کیا جلایا جا رہا ہے

فریبِ دل امیدیں کس قدر ہیں

مرا غم مسکرایا جا رہا ہے

نہ جانے کیا امیدیں ہیں کہ اب تک

غمِ ہستی اٹھایا جا رہا ہے

یہ اک دو سانس بھی کیوں لے رہا ہوں

فغاں کا حرف آیا جا رہا ہے

کسے اپنا کہیں گے وہ جہاں میں

ہمیں ہی گر مٹایا جا رہا ہے

حدیثِ شوق سے اے تاجؔ دل پر

سرور و کیف چھایا جا رہا ہے