humne mana wo sitam-ijad hai

ham ne maanā vo sitam-ījād hai

kuchh ḳhatā apnī bhī ai dil yaad hai

ai ḳhayāl-e-yār ai mūnis mire

tere dam se zindagānī shaad hai

'āshiqoñ par aa.e kyā kyā marhale

husn vaalo kuchh tumheñ bhī yaad hai

har ghaḌī hai dil ke miT jaane kā Dar

bijliyoñ se ye chaman ābād hai

al-amāñ ġham-hā-e-hastī al-amāñ

zindagī kā har nafas fariyād hai

al-hazar āshob-e-'ālam al-hazar

kārvāñ dar kārvāñ fariyād hai

kaise guzre dekhnā ab kī bahār

har qadam par daam hai sayyād hai

ai kalīmī ai barāhīmī madad

aadmī kā aadmī sayyād hai

chaar tinkoñ ko jalā kar tāj-e-barq

aaj tak bechain hai barbād hai

hum ne mana wo sitam-ijad hai

kuchh KHata apni bhi ai dil yaad hai

ai KHayal-e-yar ai munis mere

tere dam se zindagani shad hai

'ashiqon par aae kya kya marhale

husn walo kuchh tumhein bhi yaad hai

har ghaDi hai dil ke miT jaane ka Dar

bijliyon se ye chaman aabaad hai

al-aman gham-ha-e-hasti al-aman

zindagi ka har nafas fariyaad hai

al-hazar aashob-e-'alam al-hazar

karwan dar karwan fariyaad hai

kaise guzre dekhna ab ki bahaar

har qadam par dam hai sayyaad hai

ai kalimi ai barahimi madad

aadmi ka aadmi sayyaad hai

chaar tinkon ko jala kar taj-e-barq

aaj tak bechain hai barbaad hai