ہم نے مانا وہ ستم ایجاد ہے

ہم نے مانا وہ ستم ایجاد ہے

کچھ خطا اپنی بھی اے دل یاد ہے

اے خیالِ یار اے مونس مرے

تیرے دم سے زندگانی شاد ہے

عاشقوں پر آئے کیا کیا مرحلے

حسن والو کچھ تمہیں بھی یاد ہے

ہر گھڑی ہے دل کے مٹ جانے کا ڈر

بجلیوں سے یہ چمن آباد ہے

الاماں، غم ہائے ہستی، الاماں

زندگی کا ہر نفس فریاد ہے

الحذر، آشوبِ عالم، الحذر

کارواں در کارواں فریاد ہے

کیسے گزرے دیکھنا اب کی بہار

ہر قدم پر دام ہے صیاد ہے

اے کلیمی اے براہیمی مدد

آدمی کا آدمی صیاد ہے

چار تنکوں کو جلا کر تاجؔ برق

آج تک بے چین ہے برباد ہے