raushan hai duniya sari maula tere azm se

raushan hai duniyā saarī maulā tire azm se

rakhnā hameñ bhī yā-rab mahfūz har alam se

terī razā kī ḳhātir terī ḳhushī kī ḳhātir

bāñdhai the pyāre aaqā patthar ka.ī shikam se

muflis yatīm be-bas sab ko tirā sahārā

zinda haiñ sab jahāñ meñ ik tere hī karam se

'azmat tirī tū zabt-e-tahrīr meñ kyā aa.e

kaise adā ho terī hamd-o-sanā qalam se

bakHshish-o-maġhfirat kā karnā muāmla tū

har moḌ par ḳhatā.eñ hotī haiñ maulā ham se

shāh-o-gadā sabhī ko haj ho nasīb yā-rab

bandoñ kā tere rishta qaa.em rahe haram se

degā sahārā mujh ko merā ḳhudā hī 'hasrat'

hogī mirī hifāzat bātil ke har sitam se

raushan hai duniya sari maula tere azm se

rakhna hamein bhi ya-rab mahfuz har alam se

teri raza ki KHatir teri KHushi ki KHatir

bandhai the pyare aaqa patthar kai shikam se

muflis yatim be-bas sab ko tera sahaara

zinda hain sab jahan mein ek tere hi karam se

'azmat teri tu zabt-e-tahrir mein kya aae

kaise ada ho teri hamd-o-sana qalam se

bakHshish-o-maghfirat ka karna muamla tu

har moD par KHataen hoti hain maula hum se

shah-o-gada sabhi ko haj ho nasib ya-rab

bandon ka tere rishta qaem rahe haram se

dega sahaara mujh ko mera KHuda hi 'hasrat'

hogi meri hifazat baatil ke har sitam se