dard ko apne hum chhupa lenge

dard ko apne ham chhupā leñge

zaḳhm khā kar bhī muskurā.eñge

zahr paltā hai jin ke sīnoñ meñ

vo muravvat se kaam kyā leñge

jab dikhā.eñge ā.īna un ko

sharm se sar ko vo jhukā leñge

dostoñ ne to kī daġhā ham se

dushmanoñ ko bhī aazmā leñge

narm-o-nāzuk bichhaune haiñ jin ke

vo ġharīboñ kī kyā duā leñge

ham to tārīkiyoñ meñ nafrat kī

pyaar kī ik sham.a jalā leñge

dekhtā hai jo pyaar se 'hasrat'

apne dil meñ use chhupā leñge

dard ko apne hum chhupa lenge

zaKHm kha kar bhi muskuraenge

zahr palta hai jin ke sinon mein

wo murawwat se kaam kya lenge

jab dikhaenge aaina un ko

sharm se sar ko wo jhuka lenge

doston ne to ki dagha hum se

dushmanon ko bhi aazma lenge

narm-o-nazuk bichhaune hain jin ke

wo gharibon ki kya dua lenge

hum to tarikiyon mein nafrat ki

pyar ki ek shama jala lenge

dekhta hai jo pyar se 'hasrat'

apne dil mein use chhupa lenge