larza hua hai tari shoara ke fikr-o-fan mein

larza huā hai taarī sho.arā ke fikr-o-fan meñ

ye kaun aa rahā hai ġhazloñ kī anjuman meñ

naqsh-o-nigār itne dekhe haiñ us badan meñ

aisā sarāpā aanā mushkil hai husn-e-zan meñ

kaise nazar lagegī majbūr hai nazar ḳhud

taare chamak rahe haiñ is darja pairahan meñ

ab ke bahār meñ to jashn-e-bahār hogā

vo ḳhush-ḳhirām aayā ḳhushbū liye chaman meñ

in ātishī laboñ par bose haiñ zindagī ke

ta.abīr ḳhvāb-e-ġham hai jaagī huī dulhan meñ

gulshan ke gul musalsal gir gir ke hans rahe haiñ

kaisā sahar chhipā hai gulchīñ ke bāñkpan meñ

ab dhaḌkanoñ pe qaabū chaltā nahīñ kisī pal

bargashta dil huā hai apne hī jān-o-tan meñ

aao usī se sīkheñ andāz-e-ḳhush-kalāmī

shīrīñ suḳhan haiñ pinhāñ shīrīñ se us dahan meñ

tesha kudāl kaise vo nahr khod laate

josh-e-junūñ kā jazba shāmil thā kohkan meñ

tanhā nahii. hai ātish apnī zamīñ meñ yaktā

ik sher hai 'ziyā' bhī us sher nar ke ban meñ

larza hua hai tari shoara ke fikr-o-fan mein

ye kaun aa raha hai ghazlon ki anjuman mein

naqsh-o-nigar itne dekhe hain us badan mein

aisa sarapa aana mushkil hai husn-e-zan mein

kaise nazar lagegi majbur hai nazar KHud

tare chamak rahe hain is darja pairahan mein

ab ke bahaar mein to jashn-e-bahaar hoga

wo KHush-KHiram aaya KHushbu liye chaman mein

in aatishi labon par bose hain zindagi ke

tabir KHwab-e-gham hai jagi hui dulhan mein

gulshan ke gul musalsal gir gir ke hans rahe hain

kaisa sahar chhipa hai gulchin ke bankpan mein

ab dhaDkanon pe qabu chalta nahin kisi pal

bargashta dil hua hai apne hi jaan-o-tan mein

aao usi se sikhen andaz-e-KHush-kalami

shirin suKHan hain pinhan shirin se us dahan mein

tesha kudal kaise wo nahr khod late

josh-e-junun ka jazba shamil tha kohkan mein

tanha nahi hai aatish apni zamin mein yakta

ek sher hai 'ziya' bhi us sher nar ke ban mein