mai-kasho kya zindagi hai saqi-e-KHud-sar ke hath

mai-kasho kyā zindagī hai sāqī-e-ḳhud-sar ke haath

fasl-e-gul meñ bik ga.e haiñ shīsha-o-sāġhar ke haath

maiñ dil-e-pur-dard laayā huuñ mirī jaañ lījiye

aaj saudā kījiye kuchh 'āshiq-e-muztar ke haath

jin kī bholī bholī bātoñ ne merā dil le liyā

yā ilāhī maut denā tū usī kāfir ke haath

jumbish-e-lab se jalāyā qatl abrū se kiyā

zindagī aur maut donoñ hai mire dilbar ke haath

sāmrī se un butoñ ko ab to ulfat ho ga.ī

ai barahman but bike jaate haiñ jādū-gar ke haath

mai-kasho kya zindagi hai saqi-e-KHud-sar ke hath

fasl-e-gul mein bik gae hain shisha-o-saghar ke hath

main dil-e-pur-dard laya hun meri jaan lijiye

aaj sauda kijiye kuchh 'ashiq-e-muztar ke hath

jin ki bholi bholi baaton ne mera dil le liya

ya ilahi maut dena tu usi kafir ke hath

jumbish-e-lab se jalaya qatl abru se kiya

zindagi aur maut donon hai mere dilbar ke hath

samri se un buton ko ab to ulfat ho gai

ai barahman but bike jate hain jadu-gar ke hath