نحوی اور کشتی بان۔ دفتراول

ایک نحوی کشتی میں بیٹھا اور خود پرستی سے کشتی بان سے مخاطب ہوکر کہنے لگا کہ تم نے کچھ نحو پڑھی ہے۔ کشتی بان نے کہا نہیں، نحوی نے کہا کہ افسوس تونے اپنی آدھی عمر ضائع کی۔ کشتی بان مارے غصّے کے پیچ و تاب کھانے لگا مگر اس وقت خاموش رہا۔

اتفاقاً ہوا کے جھکّڑ نے کشتی کو ایک بھنور میں لاڈالا۔ کشتی بان نے نحوی سے بآوازِ بلند کہا کہ حضرت آپ کو تیرنا بھی آتا ہے یا نہیں۔ نحوی نے کہا نہیں مجھے تیرنا نہیں آتا۔ کشتی بان نے کہا کہ اے نحوی ! تیری ساری عمر ضائع گئی کیوں کہ کشتی اب گرداب میں ڈوبنے والی ہے۔

اس کہانی کی غرض یہ ہے کہ آدمی کو کسی ایک علم یا فن میں کمال حاصل ہوجانے پر شیخی نہ کرنی چاہیے۔