aa saqiya pila de mujhe jam-e-nisti

aa sāqiyā pilā de mujhe jām-e-nīstī

āḳhir banā.egī ye mirā kaam nīstī

mushrik banūñ jo nām-e-ḳhudā luuñ zabān se

yād-e-ḳhudā se kartī hai be-kām nīstī

ye zauq-o-shauq āh-o-bukā chand roza hai

ai 'āshiqo hai 'ishq kā anjām nīstī

ho jaa.e gar 'atā mujhe sarkār se to phir

devegī tā-abad mujhe ārām nīstī

gar ho sake to sāliko us ko karo husūl

yāvar hai rāh-e-haq meñ ba-har-gām nīstī

diiñ se tumhāre vā'izo rakhte nahīñ ġharaz

pairau haiñ ham to maz.hab-e-islām nīstī

hūr-o-qusūr kī nahīñ mujh ko talab 'asad'

maiñ māñgtā huuñ haq se sub.h-o-shām nīstī

aa saqiya pila de mujhe jam-e-nisti

aaKHir banaegi ye mera kaam nisti

mushrik banun jo nam-e-KHuda lun zaban se

yaad-e-KHuda se karti hai be-kaam nisti

ye zauq-o-shauq aah-o-buka chand roza hai

ai 'ashiqo hai 'ishq ka anjam nisti

ho jae gar 'ata mujhe sarkar se to phir

dewegi ta-abad mujhe aaram nisti

gar ho sake to saliko us ko karo husul

yawar hai rah-e-haq mein ba-har-gam nisti

din se tumhaare wa'izo rakhte nahin gharaz

pairau hain hum to mazhab-e-islam nisti

hur-o-qusur ki nahin mujh ko talab 'asad'

main mangta hun haq se subh-o-sham nisti