aankh laDne ka bahana ho gaya

aañkh laḌne kā bahāna ho gayā

le ke dil koī ravāna ho gayā

chun rahā hai tinke kuue yaar ke

aaj dīvāna siyānā ho gayā

uñgliyoñ se log batlāne lage

ab mirā ghar ghar fasāna ho gayā

roz haiñ tiir sitam us par bapā

dil nahīñ ġham kā nishāna ho gayā

phañs gayā dil paḌ ga.ī jis kī nigāh

zulf kyā hai qaid-ḳhāna ho gayā

aañkh se parda duī kā uTh gayā

aaj begāna yagāna ho gayā

bekasoñ kī qabr par dekho to aaj

abr-e-rahmat shāmiyāna ho gayā

dil nahīñ hai aaj pahlū meñ mire

kaun pahlū se ravāna ho gayā

us ke kūcha meñ lagā bistar mirā

kūcha gardūñ kā Thikāna ho gayā

minnatoñ se aa.e vo dil meñ mire

aaj raushan āshiyāna ho gayā

chal base ab hazrat-e-'ġhausī' kahāñ

muddateñ guzrīñ zamāna ho gayā

aankh laDne ka bahana ho gaya

le ke dil koi rawana ho gaya

chun raha hai tinke kue yar ke

aaj diwana siyana ho gaya

ungliyon se log batlane lage

ab mera ghar ghar fasana ho gaya

roz hain tir sitam us par bapa

dil nahin gham ka nishana ho gaya

phans gaya dil paD gai jis ki nigah

zulf kya hai qaid-KHana ho gaya

aankh se parda dui ka uTh gaya

aaj begana yagana ho gaya

bekason ki qabr par dekho to aaj

abr-e-rahmat shamiyana ho gaya

dil nahin hai aaj pahlu mein mere

kaun pahlu se rawana ho gaya

us ke kucha mein laga bistar mera

kucha gardun ka Thikana ho gaya

minnaton se aae wo dil mein mere

aaj raushan aashiyana ho gaya

chal base ab hazrat-e-'ghausi' kahan

muddaten guzrin zamana ho gaya