آنکھ لڑنے کا بہانہ ہو گیا

آنکھ لڑنے کا بہانہ ہو گیا

لے کے دل کوئی روانہ ہو گیا

چن رہا ہے تنکے کوئے یار کے

آج دیوانہ سیانا ہو گیا

انگلیوں سے لوگ بتلانے لگے

اب مرا گھر گھر فسانہ ہو گیا

روز ہیں تیر ستم اس پر بپا

دل نہیں غم کا نشانہ ہو گیا

پھنس گیا دل پڑ گئی جس کی نگاہ

زلف کیا ہے قید خانہ ہو گیا

آنکھ سے پردہ دوئی کا اٹھ گیا

آج بیگانہ یگانہ ہو گیا

بیکسوں کی قبر پر دیکھو تو آج

ابر رحمت شامیانہ ہو گیا

دل نہیں ہے آج پہلو میں مرے

کون پہلو سے روانہ ہو گیا

اس کے کوچہ میں لگا بستر مرا

کوچہ گردوں کا ٹھکانہ ہو گیا

منتوں سے آئے وہ دل میں مرے

آج روشن آشیانہ ہو گیا

چل بسے اب حضرت غوثیؔ کہاں

مدتیں گزریں زمانہ ہو گیا