aankh wala tere joban ka tamasha dekhe

aañkh vaalā tire joban kā tamāshā dekhe

dīda-e-kor ko kyā aa.e nazar kyā dekhe

rū-e-rañgīñ jo tirā au gul-e-rā’anā dekhe

phir na gulshan kī taraf bulbul-e-shaidā dekhe

dil agar dīda-e-vahdat se tamāshā dekhe

juz meñ kul aa.e nazar qatre meñ dariyā dekhe

chashma-e-lab ko tire dekhte haiñ yuuñ 'āshiq

duur se nahr ko jaise koī pyāsā dekhe

chuTkiyāñ rashk ne liiñ dil meñ hamāre qātil

Daab meñ 'āshiq-o-mā'shūq jo ik jā dekhe

chashm-e-majnūñ se agar parda-e-ġhaflat uTh jaa.e

apne dil hī meñ jamāl-e-ruḳh-e-lailā dekhe

kyā rakheñ ḳhizr se ham chashm-e-hidāyat ai dil

ki nahīñ dasht-e-mohabbat kā vo rasta dekhe

maiñ huuñ ai qais vo majnūñ ki ba-chashm-e-hairat

phaaḌ kar parda-e-mahmil mujhe lailā dekhe

tujh se ai nāseh-e-nādāñ ye samajhne kā nahīñ

aur koī dil-e-be-tāb ko samjhā dekhe

koī fardā bhī na fardā qiyāmat niklā

aate jaate bahut in āñkhoñ se fardā dekhe

mujh ko hañgāma-e-mahshar kā yaqīñ hai vā'iz

us ke kūche meñ ye hañgāma koī jā dekhe

intizār us kā na dīdoñ ko kahīñ le Duube

kab tak ai yaar kisī kā koī rasta dekhe

shahsavārī-e-suḳhan kā jise da'ava ho 'asar'

taosan-e-tab’ mire sāmne chamkā dekhe

aankh wala tere joban ka tamasha dekhe

dida-e-kor ko kya aae nazar kya dekhe

ru-e-rangin jo tera au gul-e-ra’ana dekhe

phir na gulshan ki taraf bulbul-e-shaida dekhe

dil agar dida-e-wahdat se tamasha dekhe

juz mein kul aae nazar qatre mein dariya dekhe

chashma-e-lab ko tere dekhte hain yun 'ashiq

dur se nahr ko jaise koi pyasa dekhe

chuTkiyan rashk ne lin dil mein hamare qatil

Dab mein 'ashiq-o-ma'shuq jo ek ja dekhe

chashm-e-majnun se agar parda-e-ghaflat uTh jae

apne dil hi mein jamal-e-ruKH-e-laila dekhe

kya rakhen KHizr se hum chashm-e-hidayat ai dil

ki nahin dasht-e-mohabbat ka wo rasta dekhe

main hun ai qais wo majnun ki ba-chashm-e-hairat

phaD kar parda-e-mahmil mujhe laila dekhe

tujh se ai naseh-e-nadan ye samajhne ka nahin

aur koi dil-e-be-tab ko samjha dekhe

koi farda bhi na farda qiyamat nikla

aate jate bahut in aankhon se farda dekhe

mujh ko hangama-e-mahshar ka yaqin hai wa'iz

us ke kuche mein ye hangama koi ja dekhe

intizar us ka na didon ko kahin le Dube

kab tak ai yar kisi ka koi rasta dekhe

shahsawari-e-suKHan ka jise da'awa ho 'asar'

taosan-e-tab’ mere samne chamka dekhe