aafat mein paDe dard ke izhaar se hum aur

aafat meñ paḌe dard ke iz.hār se ham aur

yaad aa ga.e bhūle hue kuchh us ko sitam aur

tāḳhīr kī buniyād hai ḳhud ’ujlat-e-be-jā

jaldī hai jo likhne kī to ruktā hai qalam aur

jo baat hai kal kī use ab kah nahīñ sakte

haañ aaj to ye sach hai ki tum aur ho ham aur

zāhid mire dāman pe na rakh muft kī tohmat

haath aur pasījegā to ho jā.egā nam aur

jannat bhī jahannam bhī ġharīb-ul-vatanī meñ

yā-rab yahīñ mere liye banvā de iram aur

hastī to 'adam se hai milā.e hue har saañs

kholo na kamar ko ki hai vaqfa koī dam aur

ik farq musammā hai agar us ko miTā do

hastī na koī shai hai judā aur na 'adam aur

tai hotī hai kis tarah ilāhī mirī manzil

baḌhtā huuñ jab aage to larazte haiñ qadam aur

nāseh kī malāmat pe huuñ ḳhāmosh ki āḳhir

kuchh maiñ bhī jo kahtā huuñ to khultā hai bhram aur

bhulāne ko dil 'aish-e-guzashta na burā thā

lekin ye na samajhte the ki baḌh jā.egā ġham aur

jāñkāhiyoñ meñ hijr kī de saktī hai kyā saath

ye 'umr-e-do-roza ki huī jaatī hai kam aur

aafat mein paDe dard ke izhaar se hum aur

yaad aa gae bhule hue kuchh us ko sitam aur

taKHir ki buniyaad hai KHud ’ujlat-e-be-ja

jaldi hai jo likhne ki to rukta hai qalam aur

jo baat hai kal ki use ab kah nahin sakte

han aaj to ye sach hai ki tum aur ho hum aur

zahid mere daman pe na rakh muft ki tohmat

hath aur pasijega to ho jaega nam aur

jannat bhi jahannam bhi gharib-ul-watani mein

ya-rab yahin mere liye banwa de iram aur

hasti to 'adam se hai milae hue har sans

kholo na kamar ko ki hai waqfa koi dam aur

ek farq musamma hai agar us ko miTa do

hasti na koi shai hai juda aur na 'adam aur

tai hoti hai kis tarah ilahi meri manzil

baDhta hun jab aage to larazte hain qadam aur

naseh ki malamat pe hun KHamosh ki aaKHir

kuchh main bhi jo kahta hun to khulta hai bhram aur

bhulane ko dil 'aish-e-guzashta na bura tha

lekin ye na samajhte the ki baDh jaega gham aur

jaankahiyon mein hijr ki de sakti hai kya sath

ye 'umr-e-do-roza ki hui jati hai kam aur