KHud fana ho kar main karata hun KHudai ka ghamanD

ḳhud fanā ho kar maiñ karatā huuñ ḳhudā.ī kā ghamanD

mujh meñ kuchh baaqī nahīñ hai ḳhud-numā.ī kā ghamanD

lā sharīk aur vahdahū paatā huuñ apnī hī sifat

hai merī 'azmat ke shāyāñ kibriyā.ī kā ghamanD

dekhtā huuñ sūrat-e-mā'shūq apnī zaat ko

shakl-e-ā.īna meñ rakhtā huuñ safā.ī kā ghamanD

bahr-e-vahdat meñ dikhā.ī de rahā huuñ joñ janāb

ḳhud huuñ dariyā mujh meñ hai apnī samā.ī kā ghamanD

ġhaib maknūñ kī haqīqat aap kah dete haiñ saaf

isliye hai ham ko bātin kī rasā.ī kā ghamanD

phañs ga.e haiñ 'ishq ke phande meñ ham to kyā huā

hai hamāre tā.ir-e-jāñ ko rihā.ī kā ghamanD

ham haiñ maulā 'ijz se banda bane haiñ aap ke

kab kiyā karte haiñ 'āqil ḳhud-satā.ī kā ghamanD

'ishq ke saaqī ne bhar dī daf'atan kaisī sharāb

hai ḳhum sar meñ hamāre pārsā.ī kā ghamanD

sulh-e-kul ab ham se ai shaiḳh-o-barhaman siikh lo

hargiz aapas meñ na rakkho tum laḌā.ī kā ghamanD

maiñ jo kahtā huuñ anal-haq sānī-e-mansūr huuñ

jāntā huuñ ye nahīñ apnī bhalā.ī kā ghamanD

hastī-o-zāt-o-sifāt-o-hast kī mā'nī hai ik

'abd-o-rab ke darmiyāñ kab hai judā.ī kā ghamanD

aa ga.e dhoke meñ tere kaise-kaise ’ishq-bāz

tujh ko ai pyāre hai zebā dilrubā.ī kā ghamanD

baḌhtī hai juuñ juuñ mohabbat hote haiñ barbād ham

kyā kareñ duniyā meñ terī āshnā.ī kā ghamanD

tujh meñ hai jaur-o-jafā to ham meñ bhī kab hai vafā

ai jahāñ ham se na kar tū be-vafā.ī kā ghamanD

yā 'alī dil se kahā kar gar koī mushkil ho saḳht

hai sazāvār-e-'alī 'uqda-kushā.ī kā ghamanD

kab zabāñ hai ham ko jo bāteñ kareñ ham is tarah

har koī karatā hai yahāñ apnī ban-ā.ī kā ghamanD

'āshiq ḳhvāja mu'īnuddīn kā sar jhuktā hai kab

baḌh ke hai shāhī se bhī us kī gadā.ī kā ghamanD

KHud fana ho kar main karata hun KHudai ka ghamanD

mujh mein kuchh baqi nahin hai KHud-numai ka ghamanD

la sharik aur wahdahu pata hun apni hi sifat

hai meri 'azmat ke shayan kibriyai ka ghamanD

dekhta hun surat-e-ma'shuq apni zat ko

shakl-e-aina mein rakhta hun safai ka ghamanD

bahr-e-wahdat mein dikhai de raha hun jon janab

KHud hun dariya mujh mein hai apni samai ka ghamanD

ghaib maknun ki haqiqat aap kah dete hain saf

isliye hai hum ko baatin ki rasai ka ghamanD

phans gae hain 'ishq ke phande mein hum to kya hua

hai hamare tair-e-jaan ko rihai ka ghamanD

hum hain maula 'ijz se banda bane hain aap ke

kab kiya karte hain 'aqil KHud-satai ka ghamanD

'ishq ke saqi ne bhar di daf'atan kaisi sharab

hai KHum sar mein hamare parsai ka ghamanD

sulh-e-kul ab hum se ai shaiKH-o-barhaman sikh lo

hargiz aapas mein na rakkho tum laDai ka ghamanD

main jo kahta hun anal-haq sani-e-mansur hun

jaanta hun ye nahin apni bhalai ka ghamanD

hasti-o-zat-o-sifat-o-hast ki ma'ni hai ek

'abd-o-rab ke darmiyan kab hai judai ka ghamanD

aa gae dhoke mein tere kaise-kaise ’ishq-baz

tujh ko ai pyare hai zeba dilrubai ka ghamanD

baDhti hai jun jun mohabbat hote hain barbaad hum

kya karen duniya mein teri aashnai ka ghamanD

tujh mein hai jaur-o-jafa to hum mein bhi kab hai wafa

ai jahan hum se na kar tu be-wafai ka ghamanD

ya 'ali dil se kaha kar gar koi mushkil ho saKHt

hai sazawar-e-'ali 'uqda-kushai ka ghamanD

kab zaban hai hum ko jo baaten karen hum is tarah

har koi karata hai yahan apni ban-ai ka ghamanD

'ashiq KHwaja mu'inuddin ka sar jhukta hai kab

baDh ke hai shahi se bhi us ki gadai ka ghamanD