main sun kar mast hun naghma kisi ka

maiñ sun kar mast huuñ naġhma kisī kā

suhānā dil ko hai gaanā kisī kā

mere is tār-e-dam ko chheḌ mutrib

hai us meñ naġhma-e-hū hā kisī kā

tilism-e-ġhaib hai sar meñ hamāre

sadā bajtā hai tambūra kisī kā

sadā be-saut hai jo apne dil kī

hai us meñ shor aur ġhauġhā kisī kā

muhīt ik saut hai jo do-jahāñ par

ye hai asrār-e-dar-parda kisī kā

sitāra us jism kā hai tiin khoTī

hai us meñ tār-e-sarbasta kisī kā

jo hai mizrāb dil se chheḌ jaañ meñ

basā hai aa ke sāzinda kisī kā

hameñ bhātā hai ye gaanā bajānā

dil-e-shaidā hai āshufta kisī kā

ġhazal us ramz kī maiñ ne jo likkhī

suḳhan thā dil meñ rindāna kisī kā

dogānā chhoḌ kar gaanā suno tum

zarā to maan lo kahnā kisī kā

'ibādat hai yahī sab chishtiyoñ kī

ye haq hai shaikH-e-farmūda kisī kā

namāz-e-rūh meñ hai jam.a-e-ḳhātir

nahīñ aatā hai andesha kisī kā

sadā kan kī mazāmīroñ meñ suniye

nahīñ āvāz-e-be-hūda kisī kā

zarā tum pīr-e-kāmil se samajh lo

hai maḳhfī raag meñ nukta kisī kā

sunā hai chishtiyoñ kī bazm kā raag

huā be-hosh-e-mastāna kisī kā

jo ro-ro kar hue 'ushshāq-e-sarmast

hai us naġhma meñ afsāna kisī kā

mu'īnuddīn chishtī ke sivā ab

nahīñ 'āshiq' hai dīvāna kisī kā

main sun kar mast hun naghma kisi ka

suhana dil ko hai gana kisi ka

mere is tar-e-dam ko chheD mutrib

hai us mein naghma-e-hu ha kisi ka

tilism-e-ghaib hai sar mein hamare

sada bajta hai tambura kisi ka

sada be-saut hai jo apne dil ki

hai us mein shor aur ghaugha kisi ka

muhit ek saut hai jo do-jahan par

ye hai asrar-e-dar-parda kisi ka

sitara us jism ka hai tin khoTi

hai us mein tar-e-sarbasta kisi ka

jo hai mizrab dil se chheD jaan mein

basa hai aa ke sazinda kisi ka

hamein bhata hai ye gana bajaana

dil-e-shaida hai aashufta kisi ka

ghazal us ramz ki main ne jo likkhi

suKHan tha dil mein rindana kisi ka

dogana chhoD kar gana suno tum

zara to man lo kahna kisi ka

'ibaadat hai yahi sab chishtiyon ki

ye haq hai shaikH-e-farmuda kisi ka

namaz-e-ruh mein hai jama-e-KHatir

nahin aata hai andesha kisi ka

sada kan ki mazamiron mein suniye

nahin aawaz-e-be-huda kisi ka

zara tum pir-e-kaamil se samajh lo

hai maKHfi rag mein nukta kisi ka

suna hai chishtiyon ki bazm ka rag

hua be-hosh-e-mastana kisi ka

jo ro-ro kar hue 'ushshaq-e-sarmast

hai us naghma mein afsana kisi ka

mu'inuddin chishti ke siwa ab

nahin 'ashiq' hai diwana kisi ka