aata hai dil mein but ki parastish kiya karun

aatā hai dil meñ but kī parastish kiyā karūñ

rakh kar sanam ko sāmne sajda adā karūñ

lachhman hoñ raam hoñ ki kishan jo hoñ ḳhud huuñ maiñ

zunnār Daale apne gale meñ phirā karūñ

paḌh kar fa-ainamā jo nasārā kare kalām

kyā taab hai ki is se maiñ chūñ-o-charā karūñ

mehrāb-e-kāba meñ mujhe jaane de shaiḳh agar

mimbar pe chaḌh ke ḳhutba sanam kā paḌhā karūñ

pahuñchī hai jaan laboñ pe merā naak meñ hai dam

ai 'ishq kab talak tire sadme sahā karūñ

be-nām-o-be-nishāñ ke tasavvur meñ rakh mujhe

ai dil tirī qasam ki na yād-e-ḳhudā karūñ

chhup kar dahan meñ miim ke goyā hai be-zabāñ

yaar apnā us kī kaun se muñh se sanā karūñ

lāhūt ke maqām meñ aa jaa.e gar nafas

ik dam meñ laakh baar maiñ sair-e-baqā karūñ

saut-o-sadā ke baaġh kā ḳhud huuñ maiñ 'andalīb

kab tak qafas meñ tan ke muqayyad rahā karūñ

hāsil huī haiñ sab sifateñ banda kī mujhe

phir kyuuñ na ghar meñ rab ko bulā kar milā karūñ

mansūr sā mujhe bhī abhī diije daar par

kah kar anal-haq apnī ḳhudī ko fanā karūñ

murshid hai mai-farosh to kyā Dar hai phir mujhe

lekar sharāb-e-shauq ko har dam piyā karūñ

begāne jo bane haiñ vo ham-sāya-dār haiñ

ġhībat karūñ meñ un kī na hargiz gilā karūñ

hablul-varīd kā na ho 'uqda jo tujh se hal

uljhī girah ko taar nafas kī maiñ vā karūñ

badlā hai ruuh ne jo maqām ai tabīb-e-'ishq

taskīn hogī dil ko ḳhud ab kyā davā karūñ

hai zāt-e-lā-yamūt kī ye sab ulaT-palaT

kuchh ḳhauf kar na yaar agar maiñ qazā karūñ

ḳhvāja mu'īn-e-dīn kī jo 'āshiq' ko hai madad

har ik ko kyuuñ na aap kā phir mubtalā karūñ

aata hai dil mein but ki parastish kiya karun

rakh kar sanam ko samne sajda ada karun

lachhman hon ram hon ki kishan jo hon KHud hun main

zunnar Dale apne gale mein phira karun

paDh kar fa-ainama jo nasara kare kalam

kya tab hai ki is se main chun-o-chara karun

mehrab-e-kaba mein mujhe jaane de shaiKH agar

mimbar pe chaDh ke KHutba sanam ka paDha karun

pahunchi hai jaan labon pe mera nak mein hai dam

ai 'ishq kab talak tere sadme saha karun

be-nam-o-be-nishan ke tasawwur mein rakh mujhe

ai dil teri qasam ki na yaad-e-KHuda karun

chhup kar dahan mein mim ke goya hai be-zaban

yar apna us ki kaun se munh se sana karun

lahut ke maqam mein aa jae gar nafas

ek dam mein lakh bar main sair-e-baqa karun

saut-o-sada ke bagh ka KHud hun main 'andalib

kab tak qafas mein tan ke muqayyad raha karun

hasil hui hain sab sifaten banda ki mujhe

phir kyun na ghar mein rab ko bula kar mila karun

mansur sa mujhe bhi abhi dije dar par

kah kar anal-haq apni KHudi ko fana karun

murshid hai mai-farosh to kya Dar hai phir mujhe

lekar sharab-e-shauq ko har dam piya karun

begane jo bane hain wo ham-saya-dar hain

ghibat karun mein un ki na hargiz gila karun

hablul-warid ka na ho 'uqda jo tujh se hal

uljhi girah ko tar nafas ki main wa karun

badla hai ruh ne jo maqam ai tabib-e-'ishq

taskin hogi dil ko KHud ab kya dawa karun

hai zat-e-la-yamut ki ye sab ulaT-palaT

kuchh KHauf kar na yar agar main qaza karun

KHwaja mu'in-e-din ki jo 'ashiq' ko hai madad

har ek ko kyun na aap ka phir mubtala karun