har jalwa-e-zahir hai baatin hi ki ranai

har jalva-e-zāhir hai bātin hī kī rā'nā.ī

vo aap tamāshā hai aur aap tamāshā.ī

miT kar tire kūche meñ manzil mujhe haath aa.ī

us maut pe sadqe meñ qurbān masīhā.ī

yuuñ 'ishq ke sahrā meñ kar bādiya-paimā.ī

majnūñ bhī pukār uThe saudā.ī hai saudā.ī

kuchh hosh na sarkā ho sajdoñ kā na chaukhaT kā

sañg-e-dar-e-jānāñ par aisī ho jabīñ-sā.ī

miTnā hī mohabbat meñ me'arāj-e-mohabbat hai

hone do mujhe sadqe rahne do masīhā.ī

rahbar hai mohabbat hī sahrā-e-mohabbat meñ

kuchh kaam nahīñ aatī us raah meñ dānā.ī

jab tak na mile the tum kyā kyā mujhe kahnā thā

jab sāmne tum aa.e ik baat na ban aa.ī

ḳhud apnī numā.ish ko parde se nikal aa.e

kaaTe na kaTī tum se ākHir shab-e-tanhā.ī

dīvāna 'ġhanī' mujh ko kahtī hai kahe duniyā

takmīl-e-mohabbat kī ik shart hai rusvā.ī

har jalwa-e-zahir hai baatin hi ki ra'nai

wo aap tamasha hai aur aap tamashai

miT kar tere kuche mein manzil mujhe hath aai

us maut pe sadqe mein qurban masihai

yun 'ishq ke sahra mein kar baadiya-paimai

majnun bhi pukar uThe saudai hai saudai

kuchh hosh na sarka ho sajdon ka na chaukhaT ka

sang-e-dar-e-jaanan par aisi ho jabin-sai

miTna hi mohabbat mein me'araj-e-mohabbat hai

hone do mujhe sadqe rahne do masihai

rahbar hai mohabbat hi sahra-e-mohabbat mein

kuchh kaam nahin aati us rah mein danai

jab tak na mile the tum kya kya mujhe kahna tha

jab samne tum aae ek baat na ban aai

KHud apni numaish ko parde se nikal aae

kaTe na kaTi tum se aakHir shab-e-tanhai

diwana 'ghani' mujh ko kahti hai kahe duniya

takmil-e-mohabbat ki ek shart hai ruswai