ہر جلوۂ ظاہر ہے باطن ہی کی رعنائی

ہر جلوۂ ظاہر ہے باطن ہی کی رعنائی

وہ آپ تماشا ہے اور آپ تماشائی

مٹ کر ترے کوچےمیں منزل مجھے ہاتھ آئی

اس موت پہ صدقے میں قربان مسیحائی

یوں عشق کے صحرا میں کر باد یہ پیمائی

مجنوں بھی پکار اٹھے سودائی ہے سودائی

کچھ ہوش نہ سرکا ہو سجدوں کا نہ چوکھٹ کا

سنگِ درِ جاناں پر ایسی ہو جبیں سائی

مٹنا ہی محبت میں معراجِ محبت ہے

ہونے دو مجھے صدقے رہنے دو مسیحائی

رہبر ہے محبت ہی صحرائے محبت میں

کچھ کام نہیں آتی اس راہ میں دانائی

جب تک نہ ملے تھے تم کیا کیا مجھے کہنا تھا

جب سامنے تم آئے اک بات نہ بن آئی

خود اپنی نمائش کو پردے سے نکل آئے

کاٹے نہ کٹی تم سے آخر شب تنہائی

دیونہ غنیؔ مجھ کو کہتی ہے کہے دنیا

تکمیل محبت کی اک شرط ہے رسوائی