kHayal-e-ma-siwa pi ki nagariya kaise le jaun

kHayāl-e-mā-sivā pī kī nagariyā kaise le jā.ūñ

vo yaktā hai maiñ duuje kī gagariyā kaise le jā.ūñ

ye pūjā-pāT mandir aur kalīsā gurudvāre sab

bakheḌe haiñ unheñ pī kī aTariyā kaise le jā.ūñ

sajan albelvā mujh ko biThā le apne charnoñ meñ

maiñ paapī jag meñ ye baalī umariyā kaise le jā.ūñ

to daatā hai to maulā hai to pālanhār hai sab kā

mujhe kuchh bhiik de ḳhālī gagariyā kaise le jā.ūñ

ye phāgun kā mahīna aur suhānī rut ye holī kī

ye tan man ai sakhī pī kī nagariyā kaise le jā.ūñ

husainī rañg meñ rañg de are rañgrejvā mū ko

bachā kar tujh se maiñ saadī chunariyā kaise le jā.ūñ

maiñ tū se kyā kahūñ 'kāvish' dīvānī huuñ maiñ haidar kī

churā kar us kī najroñ se najariyā kaise le jā.ūñ

kHayal-e-ma-siwa pi ki nagariya kaise le jaun

wo yakta hai main duje ki gagariya kaise le jaun

ye puja-paT mandir aur kalisa gurudware sab

bakheDe hain unhen pi ki aTariya kaise le jaun

sajan albelwa mujh ko biTha le apne charnon mein

main papi jag mein ye baali umariya kaise le jaun

to data hai to maula hai to palanhaar hai sab ka

mujhe kuchh bhik de KHali gagariya kaise le jaun

ye phagun ka mahina aur suhani rut ye holi ki

ye tan man ai sakhi pi ki nagariya kaise le jaun

husaini rang mein rang de are rangrejwa mu ko

bacha kar tujh se main sadi chunariya kaise le jaun

main tu se kya kahun 'kawish' diwani hun main haidar ki

chura kar us ki najron se najariya kaise le jaun