unki nazron ka adna ishaara jo mil gaya

un kī nazroñ kā adnā ishāra jo mil gayā

lāhūt se bhī aage hamārā ye dil gayā

saarā jahāñ chhoḌ diyā ham ne ishq meñ

zāhid kā dil savāb na milne pe hil gayā

jis ne sanam ko dil meñ biThāyā ba-sad ḳhulūs

pahuñchā vo hī murād ko rab us ko mil gayā

apnā hī aks paayā jis samt kī nazar

vaa.iz harīm-e-nāz meñ jab apnā dil gayā

kumhlā gayā thā ma.arifat-e-tauhīd kā jo phuul

ik chashm-e-mast-e-nāz meñ vaa.iz vo khul gayā

gum huuñ maiñ apnī zaat meñ 'kāvish' meñ kyā kahūñ

maiñ raaz ban gayā huuñ merā muñh bhī sil gayā

un ki nazron ka adna ishaara jo mil gaya

lahut se bhi aage hamara ye dil gaya

sara jahan chhoD diya hum ne ishq mein

zahid ka dil sawab na milne pe hil gaya

jis ne sanam ko dil mein biThaya ba-sad KHulus

pahuncha wo hi murad ko rab us ko mil gaya

apna hi aks paya jis samt ki nazar

waiz harim-e-naz mein jab apna dil gaya

kumhla gaya tha marifat-e-tauhid ka jo phul

ek chashm-e-mast-e-naz mein waiz wo khul gaya

gum hun main apni zat mein 'kawish' mein kya kahun

main raaz ban gaya hun mera munh bhi sil gaya