tere mai-KHana mein ai saqi ye kaisa josh hai

tere mai-ḳhāna meñ ai saaqī ye kaisā josh hai

dekhiye jis rind ko bhī be-ḳhud-o-mad.hosh hai

donoñ a.alam kī ḳhabar hai aur ḳhud se be-ḳhabar

be-ḳhudī meñ bhī tirā mai-ḳhvār to bā-hosh hai

mast nazroñ se pilā.e jā tū sāġhar pai ba pai

mai-kashoñ kī ziist kā hāsil ye nāv-o-nosh hai

rū-e-zebā gar na dekhe chashm vo hai chashm-kor

tire qadmoñ par na ho jab sar vabāl-e-dosh hai

tujh pe qurbāñ ai hasīn-o-mahjabīñ ye jān-o-dil

tū azal hī se ḳhatā-kāroñ kā pardā-posh hai

ab to ye hālat hai 'kāvish' kī junūn-e-ishq meñ

log kahte haiñ ki pāgal hai magar bā-hosh hai

tere mai-KHana mein ai saqi ye kaisa josh hai

dekhiye jis rind ko bhi be-KHud-o-madhosh hai

donon aalam ki KHabar hai aur KHud se be-KHabar

be-KHudi mein bhi tera mai-KHwar to ba-hosh hai

mast nazron se pilae ja tu saghar pai ba pai

mai-kashon ki zist ka hasil ye naw-o-nosh hai

ru-e-zeba gar na dekhe chashm wo hai chashm-kor

tere qadmon par na ho jab sar wabaal-e-dosh hai

tujh pe qurban ai hasin-o-mahjabin ye jaan-o-dil

tu azal hi se KHata-karon ka parda-posh hai

ab to ye haalat hai 'kawish' ki junun-e-ishq mein

log kahte hain ki pagal hai magar ba-hosh hai