chali kahan hai hamesha yahan kisi ki akaD

chalī kahāñ hai hamesha yahāñ kisī kī akaḌ

dikhā rahe ho jo tum apnī zindagī kī akaḌ

sabhī añdhere burā.ī ke ek ho kar bhī

miTā na paa.e mohabbat kī raushnī kī akaḌ

ḳhudā kī lāThī meñ āvāz to nahīñ phir bhī

nikāl detī hai ik pal meñ aadmī kī akaḌ

hazāroñ āñdhiyāñ aa.eñ ḳhizāñ bhī aa.e magar

guloñ meñ aaj bhī baaqī hai tāzgī kī akaḌ

pahuñch ke chāñd pe sābit ye kar diyā ham ne

ḳhayāl-o-fikr se aage hai aadmī kī akaḌ

añdherī raat meñ imdād le ke jugnū kī

nikālī shaam ne sab sub.h-e-āgahī kī akaḌ

sunī jo hazrat-e-‘dānish’ ne ye ġhazal merī

dikhānā bhuul ga.e apnī shā.irī kī akaḌ

chali kahan hai hamesha yahan kisi ki akaD

dikha rahe ho jo tum apni zindagi ki akaD

sabhi andhere burai ke ek ho kar bhi

miTa na pae mohabbat ki raushni ki akaD

KHuda ki laThi mein aawaz to nahin phir bhi

nikal deti hai ek pal mein aadmi ki akaD

hazaron aandhiyan aaen KHizan bhi aae magar

gulon mein aaj bhi baqi hai tazgi ki akaD

pahunch ke chand pe sabit ye kar diya hum ne

KHayal-o-fikr se aage hai aadmi ki akaD

andheri raat mein imdad le ke jugnu ki

nikali sham ne sab subh-e-agahi ki akaD

suni jo hazrat-e-‘danish’ ne ye ghazal meri

dikhana bhul gae apni shairi ki akaD