چلی کہاں ہے ہمیشہ یہاں کسی کی اکڑ

چلی کہاں ہے ہمیشہ یہاں کسی کی اکڑ

دکھا رہے ہو جو تم اپنی زندگی کی اکڑ

سبھی اندھیرے برائی کے ایک ہو کر بھی

مٹا نہ پائے محبت کی روشنی کی اکڑ

خدا کی لاٹھی میں آواز تو نہیں پھر بھی

نکال دیتی ہے اک پل میں آدمی کی اکڑ

ہزاروں آندھیاں آئیں خزاں بھی آئے مگر

گلوں میں آج بھی باقی ہے تازگی کی اکڑ

پہنچ کے چاند پہ ثابت یہ کر دیا ہم نے

خیال و فکر سے آگے ہے آدمی کی اکڑ

اندھیری رات میں امداد لے کے جگنو کی

نکالی شام نے سب صبح آگہی کی اکڑ

سنی جو حضرت دانش نے یہ غزل میری

دکھانا بھول گئے اپنی شاعری کی اکڑ