کتنا شدید غم ہے کہ احساسِ غم نہیں

کتنا شدید غم ہے کہ احساسِ غم نہیں

کیسے کہوں کہ آپ کا مجھ پہ کرم نہیں

منزل مجھے ملے نہ ملے اس کا غم نہیں

تم ساتھ ساتھ ہو میرے یہ بھی تو کم نہیں

اے آنے والے اپنی جبیں کو جھکا کے آ

یہ آستانِ یار ہے دیر و حرم نہیں

اس راستے میں سر کو جھکانا حرام ہے

جس راستے میں یار کا نقشِ قدم نہیں

جھکتی ہے کائنات بھی میری مجال کیا

سر کون سا ہے جو تیری چوکھٹ پہ خم نہیں

نشترؔ کا دل ہے اپنے گناہوں پہ مطمٸن

وہ اور ہوں گے جن کو امیدِ کرم نہیں