tamam umr kuchh aise KHayal-e-yar raha

tamām umr kuchh aise ḳhayāl-e-yār rahā

ki ba.ad-e-marg bhī har zarra be-qarār rahā

savāl-e-jabar rahā aur na iḳhtiyār rahā

mere amal kā karam par hī inhisār rahā

kis kā naqsh-e-qadam ban ke barqarār rahā

vo ḳhāk-e-pā huuñ ki vaqf-e-kHirām-e-yār rahā

merā maqām pas-e-marg rāh-guzār rahā

maiñ vo ḳhāksār huuñ ki braham merā mazār rahā

kamāl-e-sajjda to dekho ki mere sar kī jagah

dar-e-niyāz pe naqsh ḳhirām-e-yār rahā

kisī kī zulf-e-pareshāñ kā ye tasarruf hai

azal se dāman-e-hastī jo tār-tār rahā

ye kis kī ḳhaak hai āḳhir jo gard-e-rāh banī

ye kaun hai jise miT kar bhī intizār rahā

sar-e-niyāz ne sajdoñ kī intihā kar dī

nishān-e-dar na rahā phir bhī sajda-bār rahā

adam se jānib-e-hastī 'nizāmī'-e-ḳhasta

talāsh-e-yār meñ vaqf-e-talāsh-e-yār rahā

tamam umr kuchh aise KHayal-e-yar raha

ki baad-e-marg bhi har zarra be-qarar raha

sawal-e-jabar raha aur na iKHtiyar raha

mere amal ka karam par hi inhisar raha

kis ka naqsh-e-qadam ban ke barqarar raha

wo KHak-e-pa hun ki waqf-e-kHiram-e-yar raha

mera maqam pas-e-marg rah-guzar raha

main wo KHaksar hun ki braham mera mazar raha

kamal-e-sajjda to dekho ki mere sar ki jagah

dar-e-niyaz pe naqsh KHiram-e-yar raha

kisi ki zulf-e-pareshan ka ye tasarruf hai

azal se daman-e-hasti jo tar-tar raha

ye kis ki KHak hai aaKHir jo gard-e-rah bani

ye kaun hai jise miT kar bhi intizar raha

sar-e-niyaz ne sajdon ki intiha kar di

nishan-e-dar na raha phir bhi sajda-bar raha

adam se jaanib-e-hasti 'nizami'-e-KHasta

talash-e-yar mein waqf-e-talash-e-yar raha