maqam-e-wasl mein be-tab hun qarar nahin

maqām-e-vasl meñ be-tāb huuñ qarār nahīñ

taḌap rahā huuñ kisī kā bhī intizār nahīñ

nigāh-e-shauq meñ jalvoñ kā kuchh shumār nahīñ

hazār baar jo dekhūñ to ek baar nahīñ

savāl-e-dīd pe bole ki tāb-e-dīd bhī hai

uThe jo parda rahe tū ye zīnhār nahīñ

qadam qadam pe na kyuuñ sajda-rez maiñ hotā

mirī nazar meñ kahā naqsh-e-pā-e-yār nahīñ

vo rañg laayā hai har samt zauq-e-nazzāra

kahāñ vo husn nahīñ hai kahāñ nigār nahīñ

qadam qadam pe hai manzil magar 'nizāmī' ko

kahīñ qiyām nahīñ hai kahīñ qarār nahīñ

samajh ke kahnā 'nizāmī' ye kyā kahā tū ne

maqām-e-mimbar-o-mehrāb hai ye daar nahīñ

maqam-e-wasl mein be-tab hun qarar nahin

taDap raha hun kisi ka bhi intizar nahin

nigah-e-shauq mein jalwon ka kuchh shumar nahin

hazar bar jo dekhun to ek bar nahin

sawal-e-did pe bole ki tab-e-did bhi hai

uThe jo parda rahe tu ye zinhaar nahin

qadam qadam pe na kyun sajda-rez main hota

meri nazar mein kaha naqsh-e-pa-e-yar nahin

wo rang laya hai har samt zauq-e-nazzara

kahan wo husn nahin hai kahan nigar nahin

qadam qadam pe hai manzil magar 'nizami' ko

kahin qiyam nahin hai kahin qarar nahin

samajh ke kahna 'nizami' ye kya kaha tu ne

maqam-e-mimbar-o-mehrab hai ye dar nahin