aabaad hun main tab-e-ruKH-e-yar dekh kar

ābād huuñ maiñ tāb-e-ruḳh-e-yār dekh kar

jiitā huuñ zarre zarre meñ dīdār dekh kar

us kā meñ sirr hoñ ki nahīñ jis kī intihā

hairat meñ huuñ maiñ ḳhud ko pur-asrār dekh kar

paatā huuñ apne aap ko manzil meñ yuuñ ravāñ

har aan meñ maiñ ḳhud ko sar-e-dār dekh kar

ka.aba samajh ke aur na but-ḳhāna jaan kar

sar rakh diyā hai kūcha-e-dildār dekh kar

ma.alūm ho gayā mujhe sab kā hai asal ek

manzil meñ ek saath gul-o-ḳhār dekh kar

ġhāfil nahīñ huuñ manzil-e-jānāñ meñ aake maiñ

dam le rahā huuñ sāya-e-dīvār dekh kar

karte rahe sitam pe sitam aur ḳhush hue

merī vo āzmā.ish-e-āzār dekh kar

har chand mujh meñ naaz se chhupnā the chāhte

aisā na ho sakā mujhe hoshiyār dekh kar

maiñ ek naqsh-e-āb 'nizāmī' thā darmiyāñ

us ne miTā diyā mujhe be-kār dekh kar

aabaad hun main tab-e-ruKH-e-yar dekh kar

jita hun zarre zarre mein didar dekh kar

us ka mein sirr hon ki nahin jis ki intiha

hairat mein hun main KHud ko pur-asrar dekh kar

pata hun apne aap ko manzil mein yun rawan

har aan mein main KHud ko sar-e-dar dekh kar

kaba samajh ke aur na but-KHana jaan kar

sar rakh diya hai kucha-e-dildar dekh kar

malum ho gaya mujhe sab ka hai asal ek

manzil mein ek sath gul-o-KHar dekh kar

ghafil nahin hun manzil-e-jaanan mein aake main

dam le raha hun saya-e-diwar dekh kar

karte rahe sitam pe sitam aur KHush hue

meri wo aazmaish-e-azar dekh kar

har chand mujh mein naz se chhupna the chahte

aisa na ho saka mujhe hoshiyar dekh kar

main ek naqsh-e-ab 'nizami' tha darmiyan

us ne miTa diya mujhe be-kar dekh kar