agarche nafs-e-ammara mein ye jumbish nahin hoti

agarche nafs-e-ammāra meñ ye jumbish nahīñ hotī

to hargiz ḳhuld meñ aadam se yuuñ laġhzish nahīñ hotī

jo sach pūchho to ye sab nafs-e-ammāra kā sadqa hai

vagarna ahad ko ahmad kī phir ḳhvāhish nahīñ hotī

na milte nuur aapas meñ na hotā vasl ḳhalvat meñ

agar nūr-e-mohammad kī vahāñ bārish nahīñ hotī

ḳhudā kā shukr hai tauhīd ke haath aa ga.e nukte

vagarna yaad rakkho hashr meñ baḳhshish nahīñ hotī

uThā le qul hu-vallahu-ahad kā jaam hāthoñ meñ

nasha ye vo hai jis se 'umr-bhar laġhzish nahīñ hotī

chhupā rakkhā raaz allāhus-samad kā apne siine meñ

yahī vo raaz hai jis kī koī bandish nahīñ hotī

hameñ kufuvan-ahad kā raaz jab se mil gayā 'rizvāñ'

ḳhudā shāhid hai ab dil meñ koī ḳhvāhish nahīñ hotī

agarche nafs-e-ammara mein ye jumbish nahin hoti

to hargiz KHuld mein aadam se yun laghzish nahin hoti

jo sach puchho to ye sab nafs-e-ammara ka sadqa hai

wagarna ahad ko ahmad ki phir KHwahish nahin hoti

na milte nur aapas mein na hota wasl KHalwat mein

agar nur-e-mohammad ki wahan barish nahin hoti

KHuda ka shukr hai tauhid ke hath aa gae nukte

wagarna yaad rakkho hashr mein baKHshish nahin hoti

uTha le qul hu-wallahu-ahad ka jam hathon mein

nasha ye wo hai jis se 'umr-bhar laghzish nahin hoti

chhupa rakkha raaz allahus-samad ka apne sine mein

yahi wo raaz hai jis ki koi bandish nahin hoti

hamein kufuwan-ahad ka raaz jab se mil gaya 'rizwan'

KHuda shahid hai ab dil mein koi KHwahish nahin hoti