kiya karte hain ghar baiThe hi darshan un ke joban ka

kiyā karte haiñ ghar baiThe hī darshan un ke joban kā

milā hai ā.īna ham ko sikandar qalb-e-raushan kā

na maiñ kāfir na maiñ momin vo jaane aur maiñ jānūñ

sar-e-bāzār kah duuñ Dar nahīñ shaiḳh-o-barhaman kā

vahī dil meñ samāyā hai maiñ bhartā huuñ usī kā dam

na vo kāfir na momin dost hai mere laḌakpan kā

kahāñ se vo kahāñ aayā ajab kuchh rañg dikhlāyā

tamāsha dekhne aayā jahāñ meñ apne gulshan kā

surāġh us kā nahii. miltā kahāñ hai yaar harjā.ī

dhuāñ chhāyā huā hai har galī meñ āh-o-shevan kā

koī samjhe to kyā samjhe koī dekhe to kyā dekhe

ki ye siina mirā ganjīna hai us shoḳh-e-pur-fan kā

pas-e-dīvār jānāñ dafn karnā 'sahv' muztar ko

ki pahlū meñ dil-e-muztar hai kushā un kī chitvan kā

kiya karte hain ghar baiThe hi darshan un ke joban ka

mila hai aaina hum ko sikandar qalb-e-raushan ka

na main kafir na main momin wo jaane aur main jaanun

sar-e-bazar kah dun Dar nahin shaiKH-o-barhaman ka

wahi dil mein samaya hai main bharta hun usi ka dam

na wo kafir na momin dost hai mere laDakpan ka

kahan se wo kahan aaya ajab kuchh rang dikhlaya

tamasha dekhne aaya jahan mein apne gulshan ka

suragh us ka nahi milta kahan hai yar harjai

dhuan chhaya hua hai har gali mein aah-o-shewan ka

koi samjhe to kya samjhe koi dekhe to kya dekhe

ki ye sina mera ganjina hai us shoKH-e-pur-fan ka

pas-e-diwar jaanan dafn karna 'sahw' muztar ko

ki pahlu mein dil-e-muztar hai kusha un ki chitwan ka