ahl-e-fana ko nam se hasti ke nang hai

ahl-e-fanā ko naam se hastī ke nañg hai

lauh-e-mazār bhī mirī chhātī pe sañg hai

fāriġh ho baiTh fikr se donoñ jahān kī

ḳhatra jo hai so ā.īna-e-dil pe zañg hai

hairat-zada nahīñ hai faqat tū hī ā.īne

yaañ Tuk bhī jis kī aañkh khulī hai so dañg hai

is hastī-e-ḳharāb se kyā kaam thā hameñ

ai nashshā-e-zuhūr ye terī tarañg hai

gul-gīr muñh pasār na tū sham.a kī taraf

us kī zabān hī use kām-e-nahañg hai

a.alam se iḳhtiyār kī har chand sulh-e-kul

par apne saath mujh ko shab-o-roz jañg hai

maiñ kyā kahūñ tujhe nazar aayā nahīñ hai kyā

is gulshan-e-jahān kā jo kuchh ki Dhañg hai

ġhuncha shagufta hove hī hove ki us meñ 'dard'

dekhā chaman meñ jā ke to kuchh aur rañg hai

ahl-e-fana ko nam se hasti ke nang hai

lauh-e-mazar bhi meri chhati pe sang hai

farigh ho baiTh fikr se donon jahan ki

KHatra jo hai so aaina-e-dil pe zang hai

hairat-zada nahin hai faqat tu hi aaine

yan Tuk bhi jis ki aankh khuli hai so dang hai

is hasti-e-KHarab se kya kaam tha hamein

ai nashsha-e-zuhur ye teri tarang hai

gul-gir munh pasar na tu shama ki taraf

us ki zaban hi use kaam-e-nahang hai

aalam se iKHtiyar ki har chand sulh-e-kul

par apne sath mujh ko shab-o-roz jang hai

main kya kahun tujhe nazar aaya nahin hai kya

is gulshan-e-jahan ka jo kuchh ki Dhang hai

ghuncha shagufta howe hi howe ki us mein 'dard'

dekha chaman mein ja ke to kuchh aur rang hai