ghani shaKHon mein chhup kar jab koi chiDiya chahakti hai

ghanī shāḳhoñ meñ chhup kar jab koī chiḌiyā chahaktī hai

to mere dil meñ kyuuñ hasrat kī chiñgārī bhaḌaktī hai

hasīñ chaupā.e jab charne ko nikleñ sabza-zāroñ meñ

to maiñ kyā DhūñDhtā rahtā huuñ sanjīda nazāroñ meñ

sahar ke vaqt jab panhāriyāñ panghaT pe aatī haiñ

gulābī gāgaroñ ke taal par taalī bajātī haiñ

to maiñ ujḌe hue mahloñ meñ kis kī dhun meñ jaatā huuñ

shikasta bām-o-dar ko kis kī ḳhātir chuum aatā huuñ

ma.an jab TūTtī rātoñ meñ koyal kuuk uThtī hai

to mere dil meñ kyuuñ mauhūm sī ik huuk uThtī hai

ḳhunuk rātoñ meñ jab taare falak par TimTimāte haiñ

mujhe kis paikar-e-zohrā-jabīñ ke ḳhvāb aate haiñ

ye āñkheñ kaun jhapkātā hai rah-rah kar sitāroñ meñ

ye kis kā 'aks paḌtā hai shafaq ke lāla-zāroñ meñ

gulābī sīpiyoñ meñ vo guhar ban kar chamaktā hai

gulistāñ meñ gulāb-o-nastaran ban kar mahaktā hai

kabhī fānūs-e-kafūrī meñ chhup kar jagmagātā hai

kabhī vīrānoñ khetoñ par ghaTā.eñ ban ke chhātā hai

kabhī pur-ḳhauf jañgoñ meñ kabhī pur-amn shahroñ meñ

kabhī uḌte hue āñchal kī be-tartīb lahroñ meñ

kabhī mohtāj do-shīzāoñ kī bosīda jholī meñ

kabhī bachchoñ kī TuuTī totlī ma.asūm bolī meñ

kabhī maġhmūm āñkhoñ meñ kabhī raushan charāġhoñ meñ

kabhī jām-e-sifālīñ meñ kabhī labrez ayāġhoñ meñ

nasha ban kar mire ḳhvāboñ pe koī chhā.e jaatā hai

jidhar dekho udhar mub.ham ishāroñ se bulātā hai

ghani shaKHon mein chhup kar jab koi chiDiya chahakti hai

to mere dil mein kyun hasrat ki chingari bhaDakti hai

hasin chaupae jab charne ko niklen sabza-zaron mein

to main kya DhunDhta rahta hun sanjida nazaron mein

sahar ke waqt jab panhaariyan panghaT pe aati hain

gulabi gagaron ke tal par tali bajati hain

to main ujDe hue mahlon mein kis ki dhun mein jata hun

shikasta baam-o-dar ko kis ki KHatir chum aata hun

man jab TuTti raaton mein koyal kuk uThti hai

to mere dil mein kyun mauhum si ek huk uThti hai

KHunuk raaton mein jab tare falak par TimTimate hain

mujhe kis paikar-e-zohra-jabin ke KHwab aate haiñ

ye aankhen kaun jhapkata hai rah-rah kar sitaron mein

ye kis ka 'aks paDta hai shafaq ke lala-zaron mein

gulabi sipiyon mein wo guhar ban kar chamakta hai

gulistan mein gulab-o-nastaran ban kar mahakta hai

kabhi fanus-e-kafuri mein chhup kar jagmagata hai

kabhi viranon kheton par ghaTaen ban ke chhata hai

kabhi pur-KHauf jangon mein kabhi pur-amn shahron mein

kabhi uDte hue aanchal ki be-tartib lahron mein

kabhi mohtaj do-shizaon ki bosida jholi mein

kabhi bachchon ki TuTi totli masum boli mein

kabhi maghmum aankhon mein kabhi raushan charaghon mein

kabhi jam-e-sifalin mein kabhi labrez ayaghon mein

nasha ban kar mere KHwabon pe koi chhae jata hai

jidhar dekho udhar mubham ishaaron se bulata hai