kuchh nahin mangta shahon se ye shaida tera

kuchh nahīñ māñgtā shāhoñ se ye shaidā terā

is kī daulat hai faqat naqsh-e-kaf-e-pā terā

tah-ba-tah tīrgiyāñ zehn pe jab TūTtī haiñ

nuur ho jaatā hai kuchh aur huvaidā terā

kuchh nahīñ sūjhtā jab pyaas kī shiddat se mujhe

chhalak uThtā hai mirī ruuh meñ miinā terā

puure qad se meñ khaḌā huuñ to ye terā hai karam

mujh ko jhukne nahīñ detā hai sahārā terā

dast-gīrī mirī tanhā.ī kī tū ne hī to kī

maiñ to mar jaatā agar saath na hotā terā

log kahte haiñ ki saaya tire paikar kā na thā

maiñ to kahtā huuñ jahāñ-bhar pe hai saaya terā

tū bashar bhī hai magar fakHr-e-bashar bhī tū hai

mujh ko to yaad hai bas itnā sarāpā terā

maiñ tujhe 'ālam-e-ashiyā meñ bhī pā letā huuñ

log kahte haiñ ki hai 'ālam-e-bālā terā

merī āñkhoñ se jo DhūñDheñ tujhe har sū dekheñ

sirf ḳhalvat meñ jo karte haiñ nazārā terā

vo añdheroñ se bhī darrāna guzar jaate haiñ

jin ke māthe meñ chamaktā hai sitārā terā

naddiyāñ ban ke pahāḌoñ meñ to sab ghūmte haiñ

regzāroñ meñ bhī bahtā rahā dariyā terā

sharq aur ġharb meñ bikhre hue gulzāroñ ko

nik.hateñ bāñTtā hai aaj bhī sahrā terā

ab bhī zulmāt faroshoñ ko gila hai tujh se

raat baaqī thī ki sūraj nikal aayā terā

tujh se pahle kā jo maazī thā hazāroñ kā sahī

ab jo tā-hashr kā fardā hai vo tanhā terā

ek baar aur bhī bat.hā se filistīn meñ aa

rāsta dekhtī hai masjid-e-aqsā terā

kuchh nahin mangta shahon se ye shaida tera

is ki daulat hai faqat naqsh-e-kaf-e-pa tera

tah-ba-tah tirgiyan zehn pe jab TuTti hain

nur ho jata hai kuchh aur huwaida tera

kuchh nahin sujhta jab pyas ki shiddat se mujhe

chhalak uThta hai meri ruh mein mina tera

pure qad se mein khaDa hun to ye tera hai karam

mujh ko jhukne nahin deta hai sahaara tera

dast-giri meri tanhai ki tu ne hi to ki

main to mar jata agar sath na hota tera

log kahte hain ki saya tere paikar ka na tha

main to kahta hun jahan-bhar pe hai saya tera

tu bashar bhi hai magar fakHr-e-bashar bhi tu hai

mujh ko to yaad hai bas itna sarapa tera

main tujhe 'alam-e-ashiya mein bhi pa leta hun

log kahte hain ki hai 'alam-e-baala tera

meri aankhon se jo DhunDhen tujhe har su dekhen

sirf KHalwat mein jo karte hain nazara tera

wo andheron se bhi darrana guzar jate hain

jin ke mathe mein chamakta hai sitara tera

naddiyan ban ke pahaDon mein to sab ghumte hain

regzaron mein bhi bahta raha dariya tera

sharq aur gharb mein bikhre hue gulzaron ko

nikhaten banTta hai aaj bhi sahra tera

ab bhi zulmat faroshon ko gila hai tujh se

raat baqi thi ki suraj nikal aaya tera

tujh se pahle ka jo mazi tha hazaron ka sahi

ab jo ta-hashr ka farda hai wo tanha tera

ek bar aur bhi batha se filistin mein aa

rasta dekhti hai masjid-e-aqsa tera