shan-e-KHuda bhi aap mahbub-e-KHuda bhi aap hain

shān-e-ḳhudā bhī aap mahbūb-e-ḳhudā bhī aap haiñ

tajsīm-e-haq bhī aap haiñ aur haq-numā bhī aap haiñ

roz-e-abad tak aap haiñ sālār-e-jaish-e-ambiyā

roz-e-azal se murshid-e-ahl-e-safā bhī aap haiñ

qudrat kī har taḳhlīq kā haiñ aap vāhid mudda’ā

husn-e-zamīñ bhī aap haiñ nūr-e-samā bhī aap haiñ

apne rafīqoñ ke liye patthar bhī Dho.e aap ne

aur dushmanoñ ke haq meñ masrūf-e-du'ā bhī aap haiñ

islām ke halqe meñ jo auhām kā bīmār ho

us kī davā bhī aap haiñ us kī shifā bhī aap haiñ

har dā.ira āvāz kā lafz-e-mohammad ban gayā

mere liye to qibla-e-saut-o-sadā bhī aap haiñ

maiñ falsafoñ kī dhuup meñ jaltā rahā huuñ 'umr bhar

un 'ilm ke sahrāoñ meñ mauj-e-sabā bhī aap haiñ

zulmāt-e-īn-āñ meñ huuñ maiñ kab se sargarm-e-safar

aur is safar meñ merī manzil kā pata bhī aap haiñ

merā 'nadīm' īmāñ hai ye īmāñ kī ik mīzāñ hai ye

be-intihā bhī aap lekin intihā bhī aap haiñ

shan-e-KHuda bhi aap mahbub-e-KHuda bhi aap hain

tajsim-e-haq bhi aap hain aur haq-numa bhi aap hain

roz-e-abad tak aap hain salar-e-jaish-e-ambiya

roz-e-azal se murshid-e-ahl-e-safa bhi aap hain

qudrat ki har taKHliq ka hain aap wahid mudda’a

husn-e-zamin bhi aap hain nur-e-sama bhi aap hain

apne rafiqon ke liye patthar bhi Dhoe aap ne

aur dushmanon ke haq mein masruf-e-du'a bhi aap hain

islam ke halqe mein jo auham ka bimar ho

us ki dawa bhi aap hain us ki shifa bhi aap hain

har daira aawaz ka lafz-e-mohammad ban gaya

mere liye to qibla-e-saut-o-sada bhi aap hain

main falsafon ki dhup mein jalta raha hun 'umr bhar

un 'ilm ke sahraon mein mauj-e-saba bhi aap hain

zulmat-e-in-an mein hun main kab se sargarm-e-safar

aur is safar mein meri manzil ka pata bhi aap hain

mera 'nadim' iman hai ye iman ki ek mizan hai ye

be-intiha bhi aap lekin intiha bhi aap hain