ai malikan-e-taKHt wo daulat kahan gai

ai mālikān-e-taḳht vo daulat kahāñ ga.ī

vo taaj kyā huā vo hukūmat kahāñ ga.ī

kahtī hai ro ke qabr-e-sikandar pe be-kasī

vo dabdaba vo shaan vo shaukat kahāñ ga.ī

qārūñ se pochhiye vo ḳhazāna kidhar gayā

hātim se pochhiye vo saḳhāvat kahāñ ga.ī

daarā kā ḳhuun kar ke sikandar ne kyā liyā

lālach kiyā thā jis kā vo daulat kahāñ ga.ī

shaddād rū-siyah tu jahannam meñ kyuuñ gayā

kaisī ḳhudā.ī kī tirī jannat kahāñ ga.ī

hārūn rashīd jis kī ḳhilāfat kī dhuum thī

ab pochhiye vo us kī ḳhilāfat kahāñ ga.ī

āl-e-nabī pe zulm kiyā kyuuñ yazīd ne

zālim kī panj-roza vo naubat kahāñ ga.ī

lailā se pochhiye ki vo ishve kidhar ga.e

majnūñ se pochhiye vo mohabbat kahāñ ga.ī

lākhoñ hasīn kunj-e-lahad meñ samā ga.e

vo naaz kyā huā vo nazākat kahāñ ga.ī

mil paḌ ga.ī lahad meñ 'azīzoñ ko kis tarah

vo pyaar kyā huā vo mohabbat kahāñ ga.ī

paidā hue ye kaun-o-makāñ jin ke vāste

'tāhir' batā vo nuur kī sūrat kahāñ ga.ī

ai malikan-e-taKHt wo daulat kahan gai

wo taj kya hua wo hukumat kahan gai

kahti hai ro ke qabr-e-sikandar pe be-kasi

wo dabdaba wo shan wo shaukat kahan gai

qarun se pochhiye wo KHazana kidhar gaya

hatim se pochhiye wo saKHawat kahan gai

dara ka KHun kar ke sikandar ne kya liya

lalach kiya tha jis ka wo daulat kahan gai

shaddad ru-siyah tu jahannam mein kyun gaya

kaisi KHudai ki teri jannat kahan gai

haarun rashid jis ki KHilafat ki dhum thi

ab pochhiye wo us ki KHilafat kahan gai

aal-e-nabi pe zulm kiya kyun yazid ne

zalim ki panj-roza wo naubat kahan gai

laila se pochhiye ki wo ishwe kidhar gae

majnun se pochhiye wo mohabbat kahan gai

lakhon hasin kunj-e-lahad mein sama gae

wo naz kya hua wo nazakat kahan gai

mil paD gai lahad mein 'azizon ko kis tarah

wo pyar kya hua wo mohabbat kahan gai

paida hue ye kaun-o-makan jin ke waste

'tahir' bata wo nur ki surat kahan gai