ai sanam tujh pe hain qurban gul-o-aina-o-shama

ai sanam tujh pe haiñ qurbāñ gul-o-ā.īnā-o-shama'

haiñ tire ruḳh se pashemāñ gul-o-ā.īnā-o-shama'

dekh ḳhandāñ bhī haiñ hairāñ bhī haiñ giryāñ bhī haiñ

dekh kar sūrat-e-jānāñ gul-o-ā.īnā-o-shama'

bulbul-o-tūtī-o-parvāna nahīñ chāhte haiñ

tere hote hue ai jaañ gul-o-ā.īnā-o-shama'

'ishq meñ tere hue jaama se bāhar aise

ke phirā karte haiñ 'uryāñ gul-o-ā.īnā-o-shama'

rañg aur nūr-e-safā laa.e haiñ tere ghar se

haiñ tire banda-e-ehsāñ gul-o-ā.īnā-o-shama'

saaf kahtā huuñ kaho kis ke qalam se niklā

is tarah dast-o-garebāñ gul-o-ā.īnā-o-shama'

merī kilk-o-ġhazal-o-saf.ha-e-dīvāñ ko 'shahīd'

kahte haiñ saare suḳhan-dāñ gul-o-ā.īnā-o-shama'

ai sanam tujh pe hain qurban gul-o-aina-o-shama'

hain tere ruKH se pasheman gul-o-aina-o-shama'

dekh KHandan bhi hain hairan bhi hain giryan bhi hain

dekh kar surat-e-jaanan gul-o-aina-o-shama'

bulbul-o-tuti-o-parwana nahin chahte hain

tere hote hue ai jaan gul-o-aina-o-shama'

'ishq mein tere hue jama se bahar aise

ke phira karte haiñ 'uryan gul-o-aina-o-shama'

rang aur nur-e-safa lae hain tere ghar se

hain tere banda-e-ehsan gul-o-aina-o-shama'

saf kahta hun kaho kis ke qalam se nikla

is tarah dast-o-gareban gul-o-aina-o-shama'

meri kilk-o-ghazal-o-safha-e-diwan ko 'shahid'

kahte hain sare suKHan-dan gul-o-aina-o-shama'