ai shola-e-jawala jab se lau tujhse lagae baiThe hain

ai sho'la-e-javāla jab se lau tujh se lagā.e baiThe haiñ

ik aag lagī hai siine meñ aur sab se chhupā.e baiThe haiñ

hai ishq kī duniyā meñ bhī aTal qānūn amal aur radd-e-amal

dil luuT ke jaane vaale bhī dil apnā gañvā.e baiThe haiñ

taskīn kī sūrat us meñ hai kaunain kī daulat us meñ hai

tasvīr kisī kī ham apne siine se lagā.e baiThe haiñ

sab khel usī ḳhud-sar ke haiñ sab ruup usī dilbar ke haiñ

ham tohmat hastī se sar par tūfān uThā.e baiThe haiñ

ham kho.e huoñ ko chāra-garo jis haal meñ bhī haiñ rahne do

jiine do isī kī marzī par dil jis se lagā.e baiThe haiñ

ik zid hai faqat mahbūbāna ik haT hai faqat ma.ashūqāna

āñkhoñ se unheñ chhupne dījiye dil meñ to samā.ae baiThe haiñ

ik shoḳh-adā.ī hai varna manzūr hai kab parda karnā

vo apne hī jalvoñ meñ apne jalvoñ ko chhupā.e baiThe haiñ

jab diin gayā īmān gayā to phir jān-o-dil kā zikr hī kyā

ab haar bane yā jiit rahe baazī to lagā.e baiThe haiñ

kyā koī uThā saktā hai hameñ ab un ke dar se ai 'kāmil'

ham un ke bulā.e aa.e haiñ ham un ke biThā.e baiThe haiñ

ai sho'la-e-jawala jab se lau tujh se lagae baiThe hain

ek aag lagi hai sine mein aur sab se chhupae baiThe hain

hai ishq ki duniya mein bhi aTal qanun amal aur radd-e-amal

dil luT ke jaane wale bhi dil apna ganwae baiThe hain

taskin ki surat us mein hai kaunain ki daulat us mein hai

taswir kisi ki hum apne sine se lagae baiThe hain

sab khel usi KHud-sar ke hain sab rup usi dilbar ke hain

hum tohmat hasti se sar par tufan uThae baiThe hain

hum khoe huon ko chaara-garo jis haal mein bhi hain rahne do

jine do isi ki marzi par dil jis se lagae baiThe hain

ek zid hai faqat mahbubana ek haT hai faqat mashuqana

aankhon se unhen chhupne dijiye dil mein to samaae baiThe hain

ek shoKH-adai hai warna manzur hai kab parda karna

wo apne hi jalwon mein apne jalwon ko chhupae baiThe hain

jab din gaya iman gaya to phir jaan-o-dil ka zikr hi kya

ab haar bane ya jit rahe bazi to lagae baiThe hain

kya koi uTha sakta hai hamein ab un ke dar se ai 'kaamil'

hum un ke bulae aae hain hum un ke biThae baiThe hain