hai bahaar-e-bagh-e-duniya chand roz

hai bahār-e-bāġh-e-duniyā chand roz

dekh lo us kā tamāsha chand roz

ai musāfir kuuch kā sāmān kar

is sarā meñ hai baserā chand roz

dafn kar ke qabr meñ bolī qazā

ab yahāñ tum sote rahnā chand roz

hai zamīñ ik mauj dariyā koī din

āsmāñ hai bulbulā sā chand roz

hai numā.ish is jahāñ kī is tarah

jaise nau-chañdī kā melā chand roz

ġhāfilo yād-e-ilāhī chāhiye

hai bakheḌā zindagī kā chand roz

kyuuñ satāte ho kisī be-jurm ko

zālimoñ hai ye zamāna chand roz

ke rahā kuchh roz yahāñ jam koī din

kuchh dinoñ shaddād-o-kisrā chand roz

pūchhā luqmāñ se jiyā tū kitne din

dast-e-hasrat mil ke bolā chand roz

phir kahāñ 'akbar' kahāñ tum dosto

zindagī kā hai bakheḌā chand roz

hai bahaar-e-bagh-e-duniya chand roz

dekh lo us ka tamasha chand roz

ai musafir kuch ka saman kar

is sara mein hai basera chand roz

dafn kar ke qabr mein boli qaza

ab yahan tum sote rahna chand roz

hai zamin ek mauj dariya koi din

aasman hai bulbula sa chand roz

hai numaish is jahan ki is tarah

jaise nau-chandi ka mela chand roz

ghafilo yaad-e-ilahi chahiye

hai bakheDa zindagi ka chand roz

kyun satate ho kisi be-jurm ko

zalimon hai ye zamana chand roz

ke raha kuchh roz yahan jam koi din

kuchh dinon shaddad-o-kisra chand roz

puchha luqman se jiya tu kitne din

dast-e-hasrat mil ke bola chand roz

phir kahan 'akbar' kahan tum dosto

zindagi ka hai bakheDa chand roz