ہے بہار باغ دنیا چند روز

ہے بہار باغ دنیا چند روز

دیکھ لو اس کا تماشہ چند روز

اے مسافر کوچ کا سامان کر

اس سرا میں ہے بسیرا چند روز

دفن کر کے قبر میں بولی قضا

اب یہاں تم سوتے رہنا چند روز

ہے زمیں اک موج دریا کوئی دن

آسماں ہے بلبلا سا چند روز

ہے نمائش اس جہاں کی اس طرح

جیسے نو چندی کا میلا چند روز

غافلو یاد الٰہی چاہیے

ہے بکھیڑا زندگی کا چند روز

کیوں ستاتے ہو کسی بے جرم کو

ظالموں ہے یہ زمانہ چند روز

کے رہا کچھ روز یہاں جم کوئی دن

کچھ دنوں شداد و کسریٰ چند روز

پوچھا لقماں سے جیا تو کتنے دن

دست حسرت مل کے بولا چند روز

پھر کہاں اکبرؔ کہاں تم دوستو

زندگی کا ہے بکھیڑا چند روز