nigah-e-mast se ye kya pila diya tu ne

nigāh-e-mast se ye kyā pilā diyā tū ne

ragoñ meñ shor-e-anal-haq uThā diyā tū ne

maiñ ḳhush huuñ tere sivā koī aarzū na rahī

vo ġham diyā ki har ik ġham bhulā diyā tū ne

yaqīn aa.e kise maiñ to ḳhud bhī hairāñ huuñ

laboñ se kah na sakūñ jo dikhā diyā tū ne

hai soz-e-jāñ se hī takmīl-e-ādmī mumkin

vo dard baḳhshā ke insāñ banā diyā tū ne

shab-e-hayāt meñ do-gām chalnā mushkil thā

qadam qadam pe mujhe aasrā diyā tū ne

kabhī-kabhī to ye mahsūs hone lagtā hai

hijāb-e-jism hī jaise uThā diyā tū ne

na jaane kaun yahāñ aag lene aa.egā

maiñ jab bhī bujhne lagā huuñ jalā diyā tū ne

tere hī husn kī tasvīr hai har ik sūrat

butoñ ke parde meñ kāfir banā diyā tū ne

maiñ soz-e-'ishq meñ shādāb huuñ 'alīmullāh'

hazār shukr ki jiinā sikhā diyā tū ne

nigah-e-mast se ye kya pila diya tu ne

ragon mein shor-e-anal-haq uTha diya tu ne

main KHush hun tere siwa koi aarzu na rahi

wo gham diya ki har ek gham bhula diya tu ne

yaqin aae kise main to KHud bhi hairan hun

labon se kah na sakun jo dikha diya tu ne

hai soz-e-jaan se hi takmil-e-admi mumkin

wo dard baKHsha ke insan bana diya tu ne

shab-e-hayat mein do-gam chalna mushkil tha

qadam qadam pe mujhe aasra diya tu ne

kabhi-kabhi to ye mahsus hone lagta hai

hijab-e-jism hi jaise uTha diya tu ne

na jaane kaun yahan aag lene aaega

main jab bhi bujhne laga hun jala diya tu ne

tere hi husn ki taswir hai har ek surat

buton ke parde mein kafir bana diya tu ne

main soz-e-'ishq mein shadab hun 'alimullah'

hazar shukr ki jina sikha diya tu ne