jinhen main DhunDhta tha aasmanon mein zaminon mein

jinheñ maiñ DhūñDhtā thā āsmānoñ meñ zamīnoñ meñ

vo nikle mere zulmat-ḳhāna-e-dil ke makīnoñ meñ

haqīqat apnī āñkhoñ par numāyāñ jab huī apnī

makāñ niklā hamāre ḳhāna-e-dil ke makīnoñ meñ

agar kuchh āshnā hotā mazāq-e-jab.ha-sā.ī se

to sañg-e-āstāñ ka.aba jā miltā jabīnoñ meñ

kabhī apnā bhī nazāra kiyā hai tū ne ai majnūñ

ki laila kī tarah tū ḳhud bhī hai mahmil nashīnoñ meñ

mahīne vasl ke ghaḌiyoñ kī sūrat uḌte jaate haiñ

magar ghaḌiyāñ judā.ī kī guzartī haiñ mahīnoñ meñ

mujhe rokegā tū ai nāḳhudā kyā ġharq hone se

ki jin ko Dūbnā ho Duub jaate haiñ safīnoñ meñ

chhupāyā husn ko apne kalīmullāh se jis ne

vahī nāz-āfrīñ hai jalva-pairā nāznīnoñ meñ

jalā saktī hai sham'-e-kushta ko mauj-e-nafas un kī

ilāhī kyā chhupā hotā hai ahl-e-dil ke sīnoñ meñ

tamannā dard-e-dil kī ho to kar ḳhidmat faqīroñ kī

nahīñ miltā ye gauhar bādshāhoñ ke ḳhazīnoñ meñ

na pūchh un ḳhirqa-poshoñ kī irādat ho to dekh un ko

yad-e-baizā liye baiThe haiñ apnī āstīnoñ meñ

tarastī hai nigāh-e-nā-rasā jis ke nazāre ko

vo raunaq anjuman kī hai unhīñ ḳhalvat-guzīnoñ meñ

kisī aise sharar se phūñk apne ḳhirman-e-dil ko

ki kHurshīd-e-qiyāmat bhī ho tere ḳhosha-chīnoñ meñ

mohabbat ke liye dil DhūñD koī TūTne vaalā

ye vo mai hai jise rakhte haiñ nāzuk ābgīnoñ meñ

sarāpā husn ban jaatā hai jis ke husn kā āshiq

bhalā ai dil hasīñ aisā bhī hai koī hasīnoñ meñ

phaḌak uThā koī terī adā-e-mā-arfnā par

tirā rutba rahā baḌh chaḌh ke sab nāz-āfrīnoñ meñ

numāyāñ ho ke dikhlā de kabhī un ko jamāl apnā

bahut muddat se charche haiñ tire bārīk bīnoñ meñ

ḳhamosh ai dil bharī mahfil meñ chillānā nahīñ achchhā

adab pahlā qarīna hai mohabbat ke qarīnoñ meñ

burā samjhūñ unheñ mujh se to aisā ho nahīñ saktā

ki maiñ ḳhud bhī to huuñ 'iqbāl' apne nukta-chīnoñ meñ

jinhen main DhunDhta tha aasmanon mein zaminon mein

wo nikle mere zulmat-KHana-e-dil ke makinon mein

haqiqat apni aankhon par numayan jab hui apni

makan nikla hamare KHana-e-dil ke makinon mein

agar kuchh aashna hota mazaq-e-jabha-sai se

to sang-e-astan kaba ja milta jabinon mein

kabhi apna bhi nazara kiya hai tu ne ai majnun

ki laila ki tarah tu KHud bhi hai mahmil nashinon mein

mahine wasl ke ghaDiyon ki surat uDte jate hain

magar ghaDiyan judai ki guzarti hain mahinon mein

mujhe rokega tu ai naKHuda kya gharq hone se

ki jin ko Dubna ho Dub jate hain safinon mein

chhupaya husn ko apne kalimullah se jis ne

wahi naz-afrin hai jalwa-paira nazninon mein

jala sakti hai sham'-e-kushta ko mauj-e-nafas un ki

ilahi kya chhupa hota hai ahl-e-dil ke sinon mein

tamanna dard-e-dil ki ho to kar KHidmat faqiron ki

nahin milta ye gauhar baadshahon ke KHazinon mein

na puchh un KHirqa-poshon ki iradat ho to dekh un ko

yad-e-baiza liye baiThe hain apni aastinon mein

tarasti hai nigah-e-na-rasa jis ke nazare ko

wo raunaq anjuman ki hai unhin KHalwat-guzinon mein

kisi aise sharar se phunk apne KHirman-e-dil ko

ki kHurshid-e-qiyamat bhi ho tere KHosha-chinon mein

mohabbat ke liye dil DhunD koi TuTne wala

ye wo mai hai jise rakhte hain nazuk aabginon mein

sarapa husn ban jata hai jis ke husn ka aashiq

bhala ai dil hasin aisa bhi hai koi hasinon mein

phaDak uTha koi teri ada-e-ma-arfna par

tera rutba raha baDh chaDh ke sab naz-afrinon mein

numayan ho ke dikhla de kabhi un ko jamal apna

bahut muddat se charche hain tere barik binon mein

KHamosh ai dil bhari mahfil mein chillana nahin achchha

adab pahla qarina hai mohabbat ke qarinon mein

bura samjhun unhen mujh se to aisa ho nahin sakta

ki main KHud bhi to hun 'iqbaal' apne nukta-chinon mein