intiha-e-yas-o-hasrat ho gai

intihā-e-yās-o-hasrat ho ga.ī

zindagī sāmān-e-kulfat ho ga.ī

ab fareb-e-mehrbānī rā.egāñ

zindagī-bhar ko nasīhat ho ga.ī

ab umīd-e-chasm-e-ulfat be-mahal

nā-murādī vaj.h-e-’ibrat ho ga.ī

yaas kal tak jis se ham vāqif na the

aaj ummīdoñ kī ġhāyat ho ga.ī

be-kasī jis se kabhī begāna the

ab sharīk-e-ranj-o-rāhat ho ga.ī

vo ummīd-e-vasl jo dam-sāz thī

ḳhūbī-e-qismat se hasrat ho ga.ī

qissa-e-nā-kāmyābi kyā kahūñ

aah har koshish akārat ho ga.ī

ab ġham-e-furqat na armān-e-visāl

aas kyā TuuTī ki fursat ho ga.ī

'arz-e-hālat kar ke ḳhud hairān huuñ

kyā kahūñ kyūñ-kar ye jur.at ho ga.ī

kyā kareñ ahl-e-niyāz ab kyā kareñ

be-niyāzī us kī 'ādat ho ga.ī

kyā batā saktā huuñ kuchh dekhā bhī ho

parda uThnā thā ki hairat ho ga.ī

aaj tak armān baaqī haiñ to huuñ

shādmānī mil ke ruḳhsat ho ga.ī

kuchh to ai āzād hāl-e-dil batā

kuchh to kah āḳhir ye kyā gat ho ga.ī

intiha-e-yas-o-hasrat ho gai

zindagi saman-e-kulfat ho gai

ab fareb-e-mehrbani raegan

zindagi-bhar ko nasihat ho gai

ab umid-e-chasm-e-ulfat be-mahal

na-muradi wajh-e-’ibrat ho gai

yas kal tak jis se hum waqif na the

aaj ummidon ki ghayat ho gai

be-kasi jis se kabhi begana the

ab sharik-e-ranj-o-rahat ho gai

wo ummid-e-wasl jo dam-saz thi

KHubi-e-qismat se hasrat ho gai

qissa-e-na-kaamyabi kya kahun

aah har koshish akarat ho gai

ab gham-e-furqat na arman-e-visal

aas kya TuTi ki fursat ho gai

'arz-e-haalat kar ke KHud hairan hun

kya kahun kyun-kar ye jurat ho gai

kya karen ahl-e-niyaz ab kya karen

be-niyazi us ki 'adat ho gai

kya bata sakta hun kuchh dekha bhi ho

parda uThna tha ki hairat ho gai

aaj tak arman baqi hain to hun

shadmani mil ke ruKHsat ho gai

kuchh to ai aazad haal-e-dil bata

kuchh to kah aaKHir ye kya gat ho gai