mohabbat ki shirin nawa ban gae tum

mohabbat kī shīrīñ navā ban ga.e tum

mirī ziist kā aasrā ban ga.e tum

nigāheñ gulābī adā.eñ sharābī

ze-sar tā-ba-pā mai-kada ban ga.e tum

mire sajda haaye junūñ ko na bhūlo

ki jin kī badaulat ḳhudā ban ga.e tum

tasavvur kī sham.eñ farozāñ haiñ ab tak

huā kyā agar be-vafā ban ga.e tum

mujhe Duub jaane do ai nā-ḳhudāo

ki ab nāḳhudā se ḳhudā ban ga.e tum

nazar bahkī bahkī shabāb umDā umDā

javānī se pūchho ki kyā ban ga.e tum

ghaTā ban ke 'altāf' rindoñ pe barse

gulistāñ meñ bād-e-sabā ban ga.e tum

mohabbat ki shirin nawa ban gae tum

meri zist ka aasra ban gae tum

nigahen gulabi adaen sharabi

ze-sar ta-ba-pa mai-kada ban gae tum

mere sajda haye junun ko na bhulo

ki jin ki badaulat KHuda ban gae tum

tasawwur ki shamen farozan hain ab tak

hua kya agar be-wafa ban gae tum

mujhe Dub jaane do ai na-KHudao

ki ab naKHuda se KHuda ban gae tum

nazar bahki bahki shabab umDa umDa

jawani se puchho ki kya ban gae tum

ghaTa ban ke 'altaf' rindon pe barse

gulistan mein baad-e-saba ban gae tum