pina to ye hai aankhon se aankhen mila ke pi

piinā to ye hai āñkhoñ se āñkheñ milā ke pī

āñkhoñ meñ apne shaiḳh kā naqsha jamā ke pī

sunte haiñ riñd hote takalluf se be-niyāz

sāġhar ko toḌ muñh se surāhī lagā ke pī

tauhīn-e-bāda-noshī hai jo chhup ke tū piye

qānūn-e-mai-kahsī ke muḳhālif na jā ke pī

kyā rañg lā.egī ye tirī shān-e-mai-kashī

apnī nazar kisī kī nazar se milā ke pī

dekhegā zarre-zarre meñ tū jalva-gar use

aisī tasavvurāt kī duniyā basā ke pī

sajde sujūd chhoḌ de saaqī kā naam le

zāhid tū pārsā.ī ke jhagḌe miTā ke pī

sāqī-e-be-niyāz ke sadqe se ai 'amīr'

jām-e-sharāb miltā hai sar ko jhukā ke pī

pina to ye hai aankhon se aankhen mila ke pi

aankhon mein apne shaiKH ka naqsha jama ke pi

sunte hain rind hote takalluf se be-niyaz

saghar ko toD munh se surahi laga ke pi

tauhin-e-baada-noshi hai jo chhup ke tu piye

qanun-e-mai-kahsi ke muKHalif na ja ke pi

kya rang laegi ye teri shan-e-mai-kashi

apni nazar kisi ki nazar se mila ke pi

dekhega zarre-zarre mein tu jalwa-gar use

aisi tasawwuraat ki duniya basa ke pi

sajde sujud chhoD de saqi ka nam le

zahid tu parsai ke jhagDe miTa ke pi

saqi-e-be-niyaz ke sadqe se ai 'amir'

jam-e-sharab milta hai sar ko jhuka ke pi