jab tasawwur mein kisi ko samne lata hun main

jab tasavvur meñ kisī ko sāmne laatā huuñ maiñ

un ke jalvoñ kī farāvānī meñ kho jaatā huuñ maiñ

dar-haqīqat rāz-dār-e-manzil-e-maqsūd huuñ

dekhne ko har qadam par Thokareñ khātā huuñ maiñ

mujh ko le aa.ī hai us manzil pe ab merī vafā

un ke andāz-e-karam par bhī taḌap jaatā huuñ maiñ

nāzuk andāz nazrāñ kā hai utnā dil-nashīñ

tiir jo jaatā hai ḳhālī ḳhud uThā laatā huuñ maiñ

un ke har tīr-e-nazar meñ hai bharā kaif-o-surūr

zaḳhm-e-dil maiñ kyā kahūñ kyā kyā mazā paatā huuñ maiñ

lūTtā huuñ hasratoñ kī mayyateñ dil meñ liye

kyā umiid le ke un kī bazm se maiñ jaatā huuñ maiñ

ai ‘amīr’-e-sābarī rote haiñ qudsī 'arsh par

jab kabhī afsāna-e-ulfat ko dohrātā huuñ maiñ

jab tasawwur mein kisi ko samne lata hun main

un ke jalwon ki farawani mein kho jata hun main

dar-haqiqat raaz-dar-e-manzil-e-maqsud hun

dekhne ko har qadam par Thokaren khata hun main

mujh ko le aai hai us manzil pe ab meri wafa

un ke andaz-e-karam par bhi taDap jata hun main

nazuk andaz nazran ka hai utna dil-nashin

tir jo jata hai KHali KHud uTha lata hun main

un ke har tir-e-nazar mein hai bhara kaif-o-surur

zaKHm-e-dil main kya kahun kya kya maza pata hun main

luTta hun hasraton ki mayyaten dil mein liye

kya umid le ke un ki bazm se main jata hun main

ai ‘amir’-e-sabari rote hain qudsi 'arsh par

jab kabhi afsana-e-ulfat ko dohraata hun main